Ijtimoiy tarmoqlarda “Ichki ishlar xodimlari va fuqarolar o‘rtasidagi tortishuv” jarayoni aks etgan videolavha tarqaldi. Holat yuzasidan Qashqadaryo viloyati prokuraturasi ma’lumot berdi.
Aniqlanishicha, 2022-yilning 26-aprel kuni soat 17:30 larda YPX inspektori B.B. hamkasbi B.K. bilan Lacetti xizmat avtomashinasini boshqarib, Chiroqchi tumani “Oziq ovqat dehqon bozori” MCHJ ro‘parasidagi ko‘chada yuzaga kelgan tirbandlikning oldini olish maqsadida, Yo‘l harakati qoidalarining 3.27 belgisiga rioya etmasdan, taqiqlangan joyda to‘xtab turgan avtomashinalarni ovoz kuchaytirgich orqali yo‘l harakati qoidalariga rioya etishga chaqirgan.
Biroq fuqarolar N.Sh., N.B. va Q.A. YPX inspektori boshqaruvidagi avtomashinaning harakatlanishiga yo‘l qo‘ymasdan, yoniga boshqa fuqarolarni to‘plab, xizmat avtomashinasini to‘xtatib, YPX xodimlarini xizmat kiyimi, bodi-kamerasi va ko‘krak nishonini yulib olib, ularning qonuniy faoliyatiga faol qarshilik ko‘rsatgan.
Mazkur holatlar yuzasidan 26-aprel kuni Chiroqchi tuman prokuraturasi tomonidan Jinoyat kodeksining 219-moddasi 2-qismi (hokimiyat vakiliga yoki fuqaroviy burchini bajarayotgan shaxsga qarshilik ko‘rsatish va xizmat vazifasini bajarish yoki fuqaroviy burchini bajarishdan voz kechishga, shuningdek qonunga xilof harakatlar sodir etishga majbur qilish) bilan jinoyat ishi qo‘zg‘atilib, N.Sh., N.B., Q.A., lar qamoqqa olindi.
Jinoyatning boshqa ishtirokchilarini aniqlash bo‘yicha tezkor-tergov harakatlari olib borilmoqda.
Mavzuga doir:
Izoh (0)