Samarqand viloyati Narpay tumanida pul evaziga qo‘shni davlat universitetga o‘qishga kiritish va ko‘chirib bermoqchi bo‘lgan shaxs qo‘lga olindi, deb xabar beradi Bosh prokuratura huzuridagi departament.
Ma’lum qilinishicha, departament hamda DXXning Narpay tumani bo‘limlari tomonidan tezkor tadbir o‘tkazilgan. Tadbirda S.X. ismli shaxs o‘zgalar mulkini firibgarlik yo‘li bilan qo‘lga kiritishni ko‘zlab, fuqaro M.ning O‘sh texnologiya universitetidagi o‘qishini 1,4 ming dollar evaziga Samarqand davlat universitetiga ko‘chirib berishni va’da qilgani aniqlangan. Shuningdek, u yana ikki nafar fuqaroning har biriga 800 dollardan hisoblab, 1,6 ming dollar evaziga Chimkent shahridagi Muxtor Avezov nomidagi institutga 2-kursdan o‘qishga kiritib qo‘yishni va’da qilgan. Fuqaro S.X. jami 3 ming dollarni olgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 168-moddasi (firibgarlik) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Buxoroda fuqaroning Tojikistondagi o‘qishini ko‘chirib berish uchun 2 ming dollar olgan ayol qo‘lga tushgani, Surxondaryoda fuqaroning Tojikistondagi o‘qishini 1,5 ming dollar evaziga ko‘chirib berishni va’da qilgan shaxs ushlangani to‘g‘risida xabar berilgandi.
Mavzuga doir:
- DXX Samarqandda xorijdan o‘qishni ko‘chirish uchun qalbaki hujjat tayyorlovchi shaxslarni qo‘lga oldi
- Andijonda fuqarolarning xorijdagi o‘qishini O‘zbekistonga ko‘chirib berish uchun jami 3,1 ming dollar olgan shaxslar ushlandi
- Farg‘onada 30 nafar talabaning o‘qishini Qirg‘izistondan O‘zbekistonga ko‘chirib berish uchun 67 ming dollar olgan shaxslar ushlandi
Izoh (0)