Sirdaryo va Namangan viloyatlarida dehqonchilik uchun ajratilgan yer maydonlarini sotishga uringan shaxslar qo‘lga olindi, deb xabar beradi Bosh prokuratura huzuridagi departament.
Ma’lum qilinishicha, departament, DXXning Sirdaryo viloyati boshqarmalari tomonidan prokuratura va IIB xodimlari bilan hamkorlikda tezkor tadbir o‘tkazilgan. Tadbirda J.A. ismli shaxs Guliston tumani, “Hosilobod” SIU hududidan dehqon xo‘jaligi tashkil qilish uchun ajratilgan, sug‘oriladigan 25 sotix yer maydonining 10 sotixini 15 ming dollar evaziga fuqaro Z.ga tanishlari yordamida uy-joy qurish uchun rasmiylashtirib berishni va’da qilgani aniqlangan. U fuqarodan 4 ming dollar olgan vaqtida ashyoviy dalillar bilan ushlangan.
Shuningdek, departament hamda DXXning Namangan viloyati boshqarmalari tomonidan o‘tkazilgan tezkor tadbirda, muqaddam firibgarlik jinoyati uchun sudlangan G‘.Q. ismli shaxs o‘zgalarga ajratilgan yerni sotishga uringani aniqlangan. U Norin tumani “Ibrat” MFYda yashovchi kam ta’minlangan oilalarga 10 yil muddatga vaqtincha foydalanish uchun ajratilgan jami 1 gektar yer maydonini 80 million so‘m evaziga fuqaro Q.ga mahalla fuqarolar yig‘ini raisi orqali rasmiylashtirib olib berishni va’da qilgan. Oldindan kelishilgan pulning 1 million so‘mini olgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining 229-6-moddasi (sug‘oriladigan yer uchastkasiga yoki uning bir qismiga bo‘lgan huquqni sotish yoxud qonunga xilof ravishda boshqacha tarzda o‘zga shaxsga berish), 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq Samarqandda tuman hokimining soxta qarori bilan qariyb 20 ming dollarga yer sotgan xo‘jalik rahbari aniqlangani, Davlat kadastrlari palatasi Nurobod tuman filiali mutaxassislari 2 mln so‘m pora bilan ushlangani to‘g‘risida xabar berilgandi.
Izoh (0)