Ижтимоий тармоқларда «Ички ишлар ходимлари ва фуқаролар ўртасидаги тортишув» жараёни акс этган видеолавҳа тарқалди. Ҳолат юзасидан Қашқадарё вилояти прокуратураси маълумот берди.
Аниқланишича, 2022 йилнинг 26 апрель куни соат 17:30 ларда ЙПХ инспектори Б.Б. ҳамкасби Б.К. билан Lacetti хизмат автомашинасини бошқариб, Чироқчи тумани «Озиқ овқат деҳқон бозори» МЧЖ рўпарасидаги кўчада юзага келган тирбандликнинг олдини олиш мақсадида, Йўл ҳаракати қоидаларининг 3.27 белгисига риоя этмасдан, тақиқланган жойда тўхтаб турган автомашиналарни овоз кучайтиргич орқали йўл ҳаракати қоидаларига риоя этишга чақирган.
Бироқ фуқаролар Н.Ш., Н.Б. ва Қ.А. ЙПХ инспектори бошқарувидаги автомашинанинг ҳаракатланишига йўл қўймасдан, ёнига бошқа фуқароларни тўплаб, хизмат автомашинасини тўхтатиб, ЙПХ ходимларини хизмат кийими, боди-камераси ва кўкрак нишонини юлиб олиб, уларнинг қонуний фаолиятига фаол қаршилик кўрсатган.
Мазкур ҳолатлар юзасидан 26 апрель куни Чироқчи туман прокуратураси томонидан Жиноят кодексининг 219-моддаси 2-қисми (ҳокимият вакилига ёки фуқаровий бурчини бажараётган шахсга қаршилик кўрсатиш ва хизмат вазифасини бажариш ёки фуқаровий бурчини бажаришдан воз кечишга, шунингдек қонунга хилоф ҳаракатлар содир этишга мажбур қилиш) билан жиноят иши қўзғатилиб, Н.Ш., Н.Б., Қ.А., лар қамоққа олинди.
Жиноятнинг бошқа иштирокчиларини аниқлаш бўйича тезкор-тергов ҳаракатлари олиб борилмоқда.
Изоҳ (0)