Oziq-ovqat va qishloq xo‘jaligi sohasida strategik rivojlanish va tadqiqotlar xalqaro markazi xalqaro moliya institutlari tomonidan taqdim etilgan katta miqdorda kredit mablag‘lari va loyihalarni boshqarish mas’uliyatini ham o‘z zimmasiga oladi. Bu haqda markaz direktori Alisher Shukurov 25-aprel kuni markazning ochilish marosimida aytib o‘tdi, deb xabar bermoqda “Daryo” muxbiri.
Qishloq xo‘jaligi vaziri o‘rinbosari Maqsud Ro‘zmetov vazir Jamshid Xo‘jayev nomidan tadbirni ochib berdi. Uning aytishicha, bugungi kunda Qishloq xo‘jaligi vazirligi tomonidan markaz zimmasiga bir qator xalqaro tashkilotlar bilan hamkorlikda amalga oshirilayotgan 60 ga yaqin texnik ko‘mak loyihalarni muvofiqlashtirish va amalga oshirishga ko‘maklashish vazifasi yuklatilgan.
Maqsud Ro‘zmetov, shuningdek, vakillar markazning tashkil etilishi tarixi, maqsad va vazifalari to‘g‘risida ma’lumot berdi. Jumladan, ISCAD markazi ko‘p tarmoqli, qishloq xo‘jaligi oziq-ovqat strategik tahlil markazi sifatida tashkil etilib, sektorni qo‘llab-quvvatlash bo‘yicha yanada samarali siyosat, dasturlar va xizmatlarni ishlab chiqishga, fermer xo‘jaliklari va agrobiznesni rivojlantirishga, shuningdek, ichki bozorlarda va xalqaro miqyosda raqobatbardoshlikni oshirishiga ko‘mak berishi alohida ta’kidlandi.
Markaz direktori, qishloq xo‘jaligi vaziri maslahatchisi Alisher Shukurovning aytishicha, markaz hozirda xalqaro moliya institutlari tomonidan taqdim etilgan katta miqdorda kredit mablag‘lari va loyihalarni boshqarish mas’uliyatini ham o‘z zimmasiga oladi. U, shuningdek, markazning strategik qarashlari, maqsad va vazifalari hamda hal qilishi lozim bo‘lgan muammolar haqida ham ma’lumot berdi.
“Ushbu funksiyalarni birlashtirishdan maqsadi – loyihalarning uzviyligi, izchil va mantiqan aloqadorligini ta’minlash, qishloq xo‘jaligi strategiyasini amalga oshirishda qo‘llab-quvvatlashni bosqichma-bosqich yaxshilash, yanada sifatli ma’lumotlar, tadqiqot va tahlillar asosida ularning samaradorligi hamda umumiy ta’sirini oshirishdir”, — deydi u.
Izoh (0)