O‘zbekistonda endi har yili 1 ming nafargacha imtiyozga ega bo‘lmagan, muhtoj, uzoq yillar davomida davlat tibbiyot muassasalarida mehnat qilayotgan bemor tibbiyot xodimlarida yuqori texnologik operatsiyalar o‘tkaziladi. Bu haqda Sog‘liqni saqlash vazirligi xabar qildi.
Qayd etilishicha, operatsiyalar Davlat tibbiy sug‘urtasi jamg‘armasi mablag‘lari hisobidan amalga oshiriladi.
Prezident qaroriga asosan, 2022-yil 1-noyabrga qadar davlat tomonidan aholiga ko‘rsatiladigan bepul tibbiy xizmatlar va dori vositalari hajmi to‘g‘risidagi ma’lumotlarni taqdim etish imkonini beruvchi mobil ilova ishga tushiriladi.
Shuningdek, 2022-yil yakuniga qadar Andijon, Buxoro va Xorazm tibbiyot oliy ta’lim muassasalari klinikalarining neyroxirurgiya bo‘limlari negizida yuridik maqomga ega bo‘lmagan hududlararo neyroxirurgik markazlar tashkil qilinadi.
O‘z mahallasida sog‘lom turmush tarzini targ‘ib qilgan, shaxsiy namuna ko‘rsatgan tibbiyot xodimlari va jamoatchilik vakillari uchun “Xalq salomatligi posboni” ko‘krak nishoni ta’sis etiladi.
Bundan tashqari, 2022-yil 1-iyundan boshlab qon bilan bevosita ishlayotgan davlat tibbiyot muassasalari xodimlarini gepatit V kasalligiga qarshi bepul emlash amaliyoti joriy etiladi.
Eslatib o‘tamiz, 18-mart kuni Toshkentdagi “O‘zbekiston” xalqaro anjumanlar saroyida Shavkat Mirziyoyevning sog‘liqni saqlash sohasi vakillari bilan “O‘zbekiston tibbiyoti — inson qadri uchun” mavzusidagi ochiq muloqoti bo‘lib o‘tdi. Prezident ochiq muloqotga tayyorgarlik jarayonida kelib tushgan muammolarning yechimlari va bugungi takliflar bo‘yicha qisqa muddatda qarorlar qabul qilinishini ta’kidladi.
Muloqot davomida sog‘liqni saqlash tizimida islohotlar davom ettirilishi qayd etildi. Davlat rahbari hozirda sohada transformatsiya jarayoni ketayotganini aytdi. Xususan, O‘zbekistonda 1-apreldan boshlab chet eldan olib kiriladigan tibbiy jihozlar QQS va bojxona bojidan ozod qilinishi va tez tibbiy yordam tizimidagi barcha Damas’lar 2025-yilgacha zamonaviy avtomobillarga almashtirilishi ta’kidlandi. Bundan tashqari, O‘zbekistonda tibbiyot xodimlarining oylik maoshi kamida 10 foizga oshirilishi, tibbiyot oliygohlari talabalariga shifokor bo‘lib ishlashga ruxsat berilishi ma’lum qilindi.
Izoh (0)