Озиқ-овқат ва қишлоқ хўжалиги соҳасида стратегик ривожланиш ва тадқиқотлар халқаро маркази халқаро молия институтлари томонидан тақдим этилган катта миқдорда кредит маблағлари ва лойиҳаларни бошқариш масъулиятини ҳам ўз зиммасига олади. Бу ҳақда марказ директори Алишер Шукуров 25 апрель куни марказнинг очилиш маросимида айтиб ўтди, деб хабар бермоқда «Дарё» мухбири.
Қишлоқ хўжалиги вазири ўринбосари Мақсуд Рўзметов вазир Жамшид Хўжаев номидан тадбирни очиб берди. Унинг айтишича, бугунги кунда Қишлоқ хўжалиги вазирлиги томонидан марказ зиммасига бир қатор халқаро ташкилотлар билан ҳамкорликда амалга оширилаётган 60 га яқин техник кўмак лойиҳаларни мувофиқлаштириш ва амалга оширишга кўмаклашиш вазифаси юклатилган.
Мақсуд Рўзметов, шунингдек, вакиллар марказнинг ташкил этилиши тарихи, мақсад ва вазифалари тўғрисида маълумот берди. Жумладан, ISCAD маркази кўп тармоқли, қишлоқ хўжалиги озиқ-овқат стратегик таҳлил маркази сифатида ташкил этилиб, секторни қўллаб-қувватлаш бўйича янада самарали сиёсат, дастурлар ва хизматларни ишлаб чиқишга, фермер хўжаликлари ва агробизнесни ривожлантиришга, шунингдек, ички бозорларда ва халқаро миқёсда рақобатбардошликни оширишига кўмак бериши алоҳида таъкидланди.
Марказ директори, қишлоқ хўжалиги вазири маслаҳатчиси Алишер Шукуровнинг айтишича, марказ ҳозирда халқаро молия институтлари томонидан тақдим этилган катта миқдорда кредит маблағлари ва лойиҳаларни бошқариш масъулиятини ҳам ўз зиммасига олади. У, шунингдек, марказнинг стратегик қарашлари, мақсад ва вазифалари ҳамда ҳал қилиши лозим бўлган муаммолар ҳақида ҳам маълумот берди.
«Ушбу функцияларни бирлаштиришдан мақсади – лойиҳаларнинг узвийлиги, изчил ва мантиқан алоқадорлигини таъминлаш, қишлоқ хўжалиги стратегиясини амалга оширишда қўллаб-қувватлашни босқичма-босқич яхшилаш, янада сифатли маълумотлар, тадқиқот ва таҳлиллар асосида уларнинг самарадорлиги ҳамда умумий таъсирини оширишдир», — дейди у.
Изоҳ (0)