Samarqand viloyati Nurobod tumanida fuqaroni ishga kiritib qo‘yishni va’da qilib, evaziga pul talab qilgan tez yordam bo‘limi mudiri ushlandi, deb xabar beradi Bosh prokuratura huzuridagi departament.
Ma’lum qilinishicha, departament hamda DXXning Nurobod tumani bo‘limlari tomonidan IIB xodimlari bilan hamkorlikda tezkor tadbir o‘tkazilgan. Tadbirda tuman tibbiyot birlashmasining tez yordam bo‘limi mudiri Y.B. fuqaro F.dan uni tuman tibbiyot birlashmasiga tanishlari yordamida patronaj hamshirasi vazifasiga 0,75 shtat birligida ishga qabul qilishni va’da qilgani aniqlangan. Xizmati evaziga u fuqarodan 500 dollarni firibgarlik yo‘li bilan olgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Ohangaronda fuqaroni metallurgiya kombinatiga ishga kiritish uchun 3 ming dollar so‘ragan shaxslar ushlangani, Navoiyda oliy toifali sud tibbiy eksperti 1,5 mln so‘m pora bilan qo‘lga tushgani, Namanganda ayol 18 nafar fuqaroni shifoxonaga ishga joylash uchun 300 va 500 dollardan olgani to‘g‘risida xabar berilgandi.
Izoh (0)