“Roma” A Seriya chempionligini qo‘lga kiritish imkoniyatini yo‘qotdi

“Roma” Italiya chempionatining 34-turida “Inter”ga 1:3 hisobida imkoniyatni boy berdi.

Joze Mourinyo shogirdlarining Italiya chempionatidagi 13 o‘yinlik mag‘lubiyatsiz seriyasiga yakun yasaldi. So‘nggi bor rimliklar 9-yanvarda “Yuventus”ga 3:4 hisobida mag‘lub bo‘lgandi. Shundan buyon A Seriyada 7 ta g‘alaba va 5 ta durang qayd etdi.

“Inter” Italiya chempionatida ketma-ket 10 o‘yindan buyon “Roma”ga mag‘lub bo‘lmayapti. “Nerazzurilar” bu orada 4 ta g‘alaba va 6 ta durang natijaga erishishga muvaffaq bo‘lgan. Rimliklar oxirgi marta 2017-yil Milanda 3:1 hisobida g‘alaba qozongandi.

“Roma” Italiya chempionligi uchun kurashdan chiqdi. “Bo‘rilar” hisobida 34 o‘yindan so‘ng 58 ochko mavjud. Musobaqa yetakchisi “Inter” esa bitta o‘yin zaxirasi bilan 72 ochko jamg‘argan.

Rim jamoasi uch marta mamlakat chempionatida zafar quchgan (1941/42, 1982/83, 2000/01). Joze Mourinyo esa oxirgi marta APLda “Chelsi” bilan 2014/15-yilgi mavsumda Angliya chempionligini qo‘lga kiritgan.