Futbol bo‘yicha Osiyo Chempionlar Ligasi guruh bosqichi 5-turi doirasida “Nasaf” 23-aprel, shanba kuni “As-Sadd” bilan bahs yuritdi.
Teng kuchlar ostida o‘tgan birinchi bo‘limda darvozalar daxlsiz qoldi. Ikkinchi 45 daqiqalikda esa tomonlar 4 ta gol urishning uddasidan chiqdi. 63-daqiqada Akmal Mozgovoy Santi Kasorlaning xatosidan unumli foydalanib, hisobni ochdi. 75-daqiqada Husayn Norchayev birga-bir vaziyatda ajoyib harakat qilib, hisobni 2:0 ko‘rinishiga olib keldi. Oradan hech qancha o‘tmay Qatar klubi darvozaboni ham kuchli pressing natijasida xatoga yo‘l qo‘ydi. Xatodan keyin to‘pga ega chiqqan Oybek Bozorov Mozgovoyni qulay vaziyatga olib chiqdi, Akmal esa dublni rasmiylashtirdi — 3:0. Uchrashuvga qo‘shib berilgan daqiqalarda Rodrigo Tabata hisobni qisqartirishga erishdi.
Shu tariqa “Nasaf” “As-Sadd” ustidan ishonchli g‘alabaga erishdi. Jamoalarning 1-davradagi o‘yinida 1:1 hisobidagi durang qayd etilgandi.
Ushbu g‘alabadan keyin “Nasaf”ning ochkolari soni 8 taga yetdi, jamoa onlayn jadvalda 1-o‘ringa chiqib oldi. Guruhda ikkinchi bahsda “Al-Vihdat” (8) va “Al-Faysali” (4) o‘zaro bahs olib boradi.
OChL
5-tur bahsi
23-aprel, shanba
“Nasaf” O‘zbekiston — “As-Sadd” Qatar 3:1
Gollar: 1:0 — 63 Mozgovoy, 2:0 — 75 Norchayev, 3:0 — 77 Mozgovoy, 3:1 — 90+1 Tabata.“Nasaf”: 35. Abduvohid Ne’matov, 8.Dilshod Saitov (23.Sardor Sa’dullayev 90), 4.Husniddin Aliqulov, 92.Umarbek Eshmurodov, 2.Alibek Davronov, 7.Sharof Muhiddinov, 88.Marko Stanoyevich (18.Bahrom Abdurahimov 78), 22.Akmal Mozgovoy, 77.Oybek Bozorov (30.Aziz Xolmurodov 90), 17.Suhrob Nurulloyev (9.Ivan Solovyov 67), 10.Husayn Norchayev (99.Semir Smaylagich 90).
“As-Sadd”: 22.Meshaal Barsham (1.Saad ash-Shib 79), 2.Pedro Korreya (8.Ali Asad 73), 3.Abdulkarim Hassan, 6.Tariq Salmon, 7.Muhammad Vaad Albayati, 16.Bualim Huxi, 10.Hasan al-Haydos, 15.Akrom Afif, 17.Gilyerme Torres (12.Rodrigo Tabata 33), 19.Santi Kasorla, 24.Andre Ayyu.
Ogohlantirishlar: Davronov 57, Saitov 74.
Izoh (0)