“Bavariya” top-5 ligalarda “Yuventus”ning rekordini yangiladi

“Bavariya” Germaniya chempionatining 31-turida “Borussiya D”ni mag‘lub etib (3:1), muddatidan avval chempionlik masalasini hal qildi.

Myunxenliklar mamlakat chempionligini ketma-ket 10-marta qo‘lga kiritdi va bu borada “Yuventus”ni ortda qoldirdi. Turin klubi A Seriyada ketma-ket 9 marta chempion bo‘lgan edi.

Fransiyada eng uzun seriya ketma-ket 7 marta chempion bo‘lgan “Lion”ga tegishli. Ispaniyada esa “Real” rekordchi hisoblanadi. Madridliklar 5 ta sovrinni ketma-ket qo‘lga kiritgan.

Angliyaning yuqori divizionida esa to‘rtta jamoa qatorasiga 3 marta chempion bo‘lgan — “Manchester Yunayted” (2 marta), “Liverpul”, “Arsenal” va “Haddersfild”. 1992-yildan buyon formati o‘zgartirilgan APL doirasida esa “Manchester Yunayted” bu rekordni qayd etgan.

Myunxen jamoasi futbolchisi Tomas Myuller faoliyatida 11-bor Germaniya chempionligini qo‘lga kiritib, bu borada rekordchiga aylandi. Myuller 2010, 2013, 2014, 2015, 2016, 2017, 2018, 2019, 2020, 2021 va 2022-yillarda Bundesliga g‘olibi bo‘lgan.