“Manchester Yunayted”ning yangi ustozi “Barselona” futbolchisini olib kelishni xohlamoqda

“Barselona” yarim himoyachisi Frenki de Yong faoliyatini “Manchester Yunayted”da davom ettirishi mumkin.

Diario Sport nashrining xabar qilishicha, manchesterliklarning yangi bosh murabbiyi Erik ten Hag jamoada hamyurti va sobiq shogirdini ko‘rish istagida. De Yong va ten Hag “Ayaks”da birga faoliyat olib borgan.

“Barselona” niderlandni qo‘yib yuborish niyatida emas, Frenkining o‘zi ham ketish istagi bilan yonmayapti. Biroq de Yongning murabbiy bilan iliq munosabati vaziyatni o‘zgartirib yuborishi mumkin.

Katalon klubi bu holatni tushunib turibdi, jamoa juda katta miqdordagi pul taklif qilingandagina de Yongni qo‘yib yuborishga tayyor. Sababi “Barselona” moliyaviy holatni yaxshilash maqsadida istalgan taklifni ko‘rib chiqishga tayyor.

Shuningdek, “ko‘k-anorranglilar” markaziy yarim himoyani kuchaytirish uchun “Valensiya” vakili Karlos Solerni sotib olmoqchi.

Frenki de Yong 2021/22-yilgi mavsumda “Barselona” safida barcha musobaqalar doirasida 42 ta o‘yin o‘tkazib, to‘rtta gol va beshta golli uzatma muallifiga aylandi.