Ijtimoiy tarmoqlarda Samarqand viloyatining Toyloq tumanidagi maktabda 50 tup terak daraxti o‘zboshimchalik bilan kesib tashlangani xabar berildi. Mazkur voqea jamoatchilikni qiziqtirgani bois viloyat Ekologiya va atrof muhitni muhofaza qilish boshqarmasi axborot xizmati holatga e’tibor qaratib, daraxtlar o‘zboshimchalik bilan kesilganini bildirdi. Shuningdek, mazkur holatga yo‘l qo‘yganlarga chora ko‘rilishini qo‘shimcha qildi.
“Daryo” tahririyatiga murojaat qilgan maktab rahbariyati esa daromad olish maqsadida maktab jamoasi tomonidan ekilgan 50 tup terakni kesish bo‘yicha viloyat Ekologiya va atrof-muhitni muhofaza qilish boshqarmasidan ruxsat olinganini, boshqarma o‘zlari ekkan terakni kesish uchun maxsus ruxsatnoma talab qilinmasligini bildirganini ma’lum qildi.
Xo‘sh, unda boshqarma mas’ullari nima uchun OAV vakillariga maktabdagi teraklar o‘zboshimchalik bilan kesilganini ma’lum qildi.
“Daryo” tahririyatiga viloyat Ekologiya va atrof-muhitni muhofaza qilish boshqarmasi mazkur masalada noto‘g‘ri ma’lumot berganligini tasdiqlovchi hujjatlar taqdim etilgach, muxbir Farhod Norbo‘tayev holatni o‘rgandi.
Ma’lum bo‘lishicha, Toyloq tumani xalq ta’limi bo‘limiga qarashli 15-ixtisoslashtirilgan davlat umumiy o‘rta ta’lim maktabi direktori Firdavs Komilov 2022-yilning 26-yanvar kuni Toyloq tuman ekologiya va atrof-muhitni muhofaza qilish sohasidagi nazorat inspeksiyasiga xat bilan murojaat qilgan. Unda 15-IDUMdagi teraklarni kesib olishga ruxsat berilishini so‘ragan.
Mas’ullar mazkur xatga 2022-yilning 3-mart kuni javob berib, “...maktab hududidagi terak daraxtlari ‘O‘simlik dunyosini muhofaza qilish va undan foydalanish to‘g‘risida’gi O‘zbekiston Respublikasi qonunining 45-moddasi 4-xat boshiga asosan ‘Yog‘och olish va mevalar yetishtirish uchun maxsus ekilgan, shu bois yuridik va jismoniy shaxslarning mulki bo‘lgan daraxtlar va butalarni (teraklar va boshqa tez o‘sadigan turlar, tutzorlar, mevali daraxtlar va butalar) kesish uchun ruxsatnoma talab qilinmaydi’”, degan javobni bergan.
Shuningdek, Vazirlar Mahkamasining 2019-yil 17-yanvardagi “Davlat o‘rmon fondiga kirmaydigan yerlarda daraxtlar va butalardan foydalanishni tartibga solish va ulardan foydalanish sohasidagi ruxsat berish tartibini yana-da takomillashtirish to‘g‘risida”gi qarorining 37-moddasida “Yuridik va jismoniy shaxslarning mulki bo‘lgan va ular tomonidan yog‘och-taxta va hosil olish uchun ekilgan daraxtlar va butalarni, shu jumladan, ipak qurtini boqish maqsadida tut daraxti shoxlarini kesishda Davlat ekologiya qo‘mitasining xulosasi talab etilmaydi”, deb ko‘rsatib qo‘yilgan.
Yuqoridagi qonun va qarorlarni asos qilib olgan Toyloq tuman ekologiya va atrof-muhitni muhofaza qilish sohasidagi nazorat inspeksiyasi 15-maktab rahbariga viloyat Ekologiya va atrof-muhitni muhofaza qilish boshqarmasining xulosasisiz daraxtlarni kesib olishi mumkinligini ma’lum qilgan.
Holatga aniqlik kiritish maqsadida viloyat Ekologiya va atrof-muhitni muhofaza qilish boshqarmasi axborot xizmati rahbari Sherali Iskandarov bilan bog‘landik. U 15-maktabdagi 50 tup daraxtlarni tumandagi “Navzandak” mahallasida yashovchi fuqaro Orziqul Turdiyev kesib olish uchun ruxsat so‘raganligini bildirib, talab qonunan mumkin bo‘lmaganligi uchun rad etilganligini bildirdi.
Vaholanki, “Navzandak” mahallasida yashovchi fuqaro Orziqul Turdiyev o‘zining qishlog‘idagi 50 tup daraxtlarni kesish uchun ruxsat so‘raganligi, uning murojaati 15-IDUM bilan umuman aloqasi yo‘qligi aniqlandi.
15-IDUM direktori Firdavs Komilovning aytishicha, maktab hududidagi 50 tup daraxtlarning kesilishi va undan tushgan mablag‘lar maktab ehtiyoji uchun ishlatilishi yuzasidan dalolatnoma tuzilgan.
Sherali Iskandarov 50 tup daraxtni kesishga ruxsat so‘ragan kishi 15-IDUMda maktab direktorining xo‘jalik ishlari bo‘yicha o‘rinbosari ekanini aytdi. Maktab direktori esa buni rad etdi.
“Maktabimizda Orziqul Turdiyev degan fuqaro ishlamaydi. ‘Zavxoz’ o‘zimizning qo‘shni qishlog‘imizdan. Ular biz haqimizda noto‘g‘ri ma’lumot berishgan”, — deydi Firdavs Komilov.
Viloyat Ekologiya va atrof-muhitni muhofaza qilish boshqarmasi axborot xizmati rahbari Sherali Iskandarov asl holatni yashirish maqsadida OAV vakillariga noto‘g‘ri ma’lumotlar berayotganligi oydinlashdi. Shundan so‘ng, axborot xizmati rahbari o‘z aybini tan olib, rahbarining topshirig‘i asosida ushbu munosabatni yozganligini bildirdi. Qiziq jihati shundaki, ular fuqaro va yuridik tashkilotning murojaatini almashtirib yuborgan holda rasmiy munosabat bildirgan.
“To‘g‘risi o‘zim ham tushunmay qoldim. Asl holat qanday bo‘lganligini Siz aytganingizdan so‘ng tagiga yetdim. O‘sha vaqtda boshliqning holatga munosabat bering, deb aytgan topshirig‘i sababli noto‘g‘ri munosabat berib yuborganmiz”, — deydi Sherali Iskandarov.
AOKAning Samarqand viloyati boshqarmasi viloyat Ekologiya boshqarmasi axborot xizmatining bu mas’uliyatsizligini qanday baholaydi?
Izoh (0)