Shavkat Mirziyoyev hududlar iqtisodiyoti, aholi turmush sharoitlari bilan tanishish maqsadida Qashqadaryo viloyatiga yetib kelib tashrifni Ko‘kdala tumanidan boshlagani to‘g‘risida xabar berilgandi. “Daryo” muxbirining ma’lum qilishicha, bu yerda davlat rahbari tuman faollari bilan uchrashuv o‘tkazmoqda.
Shavkat Mirziyoyev uchrashuv davomida Ko‘kdala tumanida maktab, bog‘cha qurish kerakligi, shuningdek, gaz va suvni olib kelish bo‘yicha ishlar amalga oshirilishi kerakligini ta’kidlagan.
“Bu yerda ham turli quyosh elektr stansiyasi, shamol elektr stansiyalari ochamiz. Yoshlarimiz unda ishlashadi. Mening kelishimdan maqsad — Qashqadaryoni ahlini uyg‘otish”, — deydi prezident.
Shavkat Mirziyoyev Qashqadaryo viloyati hokimi haqida ham gapirib o‘tgan. “‘Toshkent ko‘rgan’, degan gap bor-ku. Men ham Murodjon Azimovga Toshkentni ko‘rsatib hokim qilib olib keldim”, — deya qayd etgan davlat rahbari
Eslatib o‘tamiz, Shavkat Mirziyoyev viloyatda ikki kun — 21—22-aprel kunlari bo‘ladi. Tashrif doirasida prezident klaster va sanoat korxonalarida, fermer xo‘jaligi dalasida bo‘ladi, bunyodkorlik ishlari, mahallalardagi o‘zgarishlar bilan tanishadi. Shuningdek, xalq bilan muloqot, viloyat faollari bilan uchrashuv, qishloq xo‘jaligi va sanoat loyihalari taqdimoti ham rejalashtirilgan.
Izoh (0)