Shavkat Mirziyoyev Qashqadaryoning Ko‘kdala tumaniga tashrifida o‘tkazilgan faollari bilan uchrashuvda Amir Temur mudofaa merosi haqida gapirdi, deb xabar bermoqda “Daryo” muxbiri.
“Ozroq vaqtim bo‘lsa kitob o‘qiyman. Sohibqiron Amir Temurning To‘xtamishxonning jangi haqida o‘qib chiqdim. Amir Temur bu jangda yettita usulni qo‘llagan ekan. Jasorati, o‘z askarlarini mardonavor tarbiyalashi bilan birga, janglarni ham o‘zi boshqargan. O‘zim uchun ham bu yangilik bo‘ldi. Keyin kimdir shu jang usulini o‘rgangani bilan qiziqib ko‘rdim. Hech kim o‘rganmagan ekan. Eng avvalo bobolarimizning usullarini o‘rganishimiz kerak”, — dedi prezident va sohibqironning jangovar merosini chuqur o‘rganish bo‘yicha topshiriq berganini aytdi.
Eslatib o‘tamiz, Shavkat Mirziyoyev hududlar iqtisodiyoti, aholi turmush sharoitlari bilan tanishish maqsadida Qashqadaryo viloyatiga yetib keldi va tashrifni Ko‘kdala tumanidan boshladi. Prezident tuman faollari bilan uchrashuvda bu hududda amalga oshirilishi rejalashtirilgan ishlar borligini ta’kidladi.
Davlat rahbari uchrashuv davomida Ko‘kdala tumanida maktab, bog‘cha qurish kerakligi, shuningdek, gaz va suvni olib kelish bo‘yicha ishlar amalga oshirilishi kerakligini aytdi.
Prezident viloyatda ikki kun — 21—22-aprel kunlari bo‘ladi. Tashrif doirasida prezident klaster va sanoat korxonalarida, fermer xo‘jaligi dalasida bo‘ladi, bunyodkorlik ishlari, mahallalardagi o‘zgarishlar bilan tanishadi, qishloq xo‘jaligi va sanoat loyihalari taqdimoti o‘tkaziladi.
Izoh (0)