Ижтимоий тармоқларда Самарқанд вилоятининг Тойлоқ туманидаги мактабда 50 туп терак дарахти ўзбошимчалик билан кесиб ташлангани хабар берилди. Мазкур воқеа жамоатчиликни қизиқтиргани боис вилоят Экология ва атроф муҳитни муҳофаза қилиш бошқармаси ахборот хизмати ҳолатга эътибор қаратиб, дарахтлар ўзбошимчалик билан кесилганини билдирди. Шунингдек, мазкур ҳолатга йўл қўйганларга чора кўрилишини қўшимча қилди.
«Дарё» таҳририятига мурожаат қилган мактаб раҳбарияти эса даромад олиш мақсадида мактаб жамоаси томонидан экилган 50 туп теракни кесиш бўйича вилоят Экология ва атроф-муҳитни муҳофаза қилиш бошқармасидан рухсат олинганини, бошқарма ўзлари эккан теракни кесиш учун махсус рухсатнома талаб қилинмаслигини билдирганини маълум қилди.
Хўш, унда бошқарма масъуллари нима учун ОАВ вакилларига мактабдаги тераклар ўзбошимчалик билан кесилганини маълум қилди.
«Дарё» таҳририятига вилоят Экология ва атроф-муҳитни муҳофаза қилиш бошқармаси мазкур масалада нотўғри маълумот берганлигини тасдиқловчи ҳужжатлар тақдим этилгач, мухбир Фарҳод Норбўтаев ҳолатни ўрганди.
Маълум бўлишича, Тойлоқ тумани халқ таълими бўлимига қарашли 15-ихтисослаштирилган давлат умумий ўрта таълим мактаби директори Фирдавс Комилов 2022 йилнинг 26 январь куни Тойлоқ туман экология ва атроф-муҳитни муҳофаза қилиш соҳасидаги назорат инспекциясига хат билан мурожаат қилган. Унда 15-ИДУМдаги теракларни кесиб олишга рухсат берилишини сўраган.
Масъуллар мазкур хатга 2022 йилнинг 3 март куни жавоб бериб, «...мактаб ҳудудидаги терак дарахтлари ‘Ўсимлик дунёсини муҳофаза қилиш ва ундан фойдаланиш тўғрисидаъги Ўзбекистон Республикаси қонунининг 45-моддаси 4-хат бошига асосан ‘Ёғоч олиш ва мевалар етиштириш учун махсус экилган, шу боис юридик ва жисмоний шахсларнинг мулки бўлган дарахтлар ва буталарни (тераклар ва бошқа тез ўсадиган турлар, тутзорлар, мевали дарахтлар ва буталар) кесиш учун рухсатнома талаб қилинмайди’», деган жавобни берган.
Шунингдек, Вазирлар Маҳкамасининг 2019 йил 17 январдаги «Давлат ўрмон фондига кирмайдиган ерларда дарахтлар ва буталардан фойдаланишни тартибга солиш ва улардан фойдаланиш соҳасидаги рухсат бериш тартибини яна-да такомиллаштириш тўғрисида»ги қарорининг 37-моддасида «Юридик ва жисмоний шахсларнинг мулки бўлган ва улар томонидан ёғоч-тахта ва ҳосил олиш учун экилган дарахтлар ва буталарни, шу жумладан, ипак қуртини боқиш мақсадида тут дарахти шохларини кесишда Давлат экология қўмитасининг хулосаси талаб этилмайди», деб кўрсатиб қўйилган.
Юқоридаги қонун ва қарорларни асос қилиб олган Тойлоқ туман экология ва атроф-муҳитни муҳофаза қилиш соҳасидаги назорат инспекцияси 15-мактаб раҳбарига вилоят Экология ва атроф-муҳитни муҳофаза қилиш бошқармасининг хулосасисиз дарахтларни кесиб олиши мумкинлигини маълум қилган.
Ҳолатга аниқлик киритиш мақсадида вилоят Экология ва атроф-муҳитни муҳофаза қилиш бошқармаси ахборот хизмати раҳбари Шерали Искандаров билан боғландик. У 15-мактабдаги 50 туп дарахтларни тумандаги «Навзандак» маҳалласида яшовчи фуқаро Орзиқул Турдиев кесиб олиш учун рухсат сўраганлигини билдириб, талаб қонунан мумкин бўлмаганлиги учун рад этилганлигини билдирди.
Ваҳоланки, «Навзандак» маҳалласида яшовчи фуқаро Орзиқул Турдиев ўзининг қишлоғидаги 50 туп дарахтларни кесиш учун рухсат сўраганлиги, унинг мурожаати 15-ИДУМ билан умуман алоқаси йўқлиги аниқланди.
15-ИДУМ директори Фирдавс Комиловнинг айтишича, мактаб ҳудудидаги 50 туп дарахтларнинг кесилиши ва ундан тушган маблағлар мактаб эҳтиёжи учун ишлатилиши юзасидан далолатнома тузилган.
Шерали Искандаров 50 туп дарахтни кесишга рухсат сўраган киши 15-ИДУМда мактаб директорининг хўжалик ишлари бўйича ўринбосари эканини айтди. Мактаб директори эса буни рад этди.
«Мактабимизда Орзиқул Турдиев деган фуқаро ишламайди. ‘Завхоз’ ўзимизнинг қўшни қишлоғимиздан. Улар биз ҳақимизда нотўғри маълумот беришган», — дейди Фирдавс Комилов.
Вилоят Экология ва атроф-муҳитни муҳофаза қилиш бошқармаси ахборот хизмати раҳбари Шерали Искандаров асл ҳолатни яшириш мақсадида ОАВ вакилларига нотўғри маълумотлар бераётганлиги ойдинлашди. Шундан сўнг, ахборот хизмати раҳбари ўз айбини тан олиб, раҳбарининг топшириғи асосида ушбу муносабатни ёзганлигини билдирди. Қизиқ жиҳати шундаки, улар фуқаро ва юридик ташкилотнинг мурожаатини алмаштириб юборган ҳолда расмий муносабат билдирган.
«Тўғриси ўзим ҳам тушунмай қолдим. Асл ҳолат қандай бўлганлигини Сиз айтганингиздан сўнг тагига етдим. Ўша вақтда бошлиқнинг ҳолатга муносабат беринг, деб айтган топшириғи сабабли нотўғри муносабат бериб юборганмиз», — дейди Шерали Искандаров.
АОКАнинг Самарқанд вилояти бошқармаси вилоят Экология бошқармаси ахборот хизматининг бу масъулиятсизлигини қандай баҳолайди?
Изоҳ (0)