Prezident Shavkat Mirziyoyev Qashqadaryo viloyatiga qilgan safari davomida Oilaviy bolalar uyini tashkil etgan, mehribonlik uylaridan bir necha bolani o‘z qaramog‘iga olgan oilalar bilan suhbatda bo‘ldi. Bu haqda “Daryo” muxbiri xabar bermoqda.
Qashqadaryo viloyati 4-mehribonlik uyida tarbiyalangan 136 nafar bolalardan, 29 nafari oila va yaqin qarindoshlariga, 91 nafari oilaviy bolalar uylariga, 10 nafari ta’lim muassasasiga o‘qishga kirganligi, 5 nafari 18 yoshga to‘lganligi, 1 nafari boshqa muassasasiga o‘tkazilganligi munosabati bilan 2021-yilning 27-dekabr kuni 4-mehribonlik uyining faoliyati tugatilgan.
2021-yil 9-avgust kunidan 16 ta oilaviy bolalar uylari tashkil etilib, 98 nafar bola tarbiyalanmoqda, shundan 91 nafari mehribonlik uyidan va 7 nafari IIB Voyaga yetmaganlar ijtimoiy markazidan qabul qilingan.
Ma’lumot uchun, Xaqnazarov, Samiyev, Norboyev, Choriyev, Allanazarov, Qodirov, Ismoilov va Jo‘rayevlar 5 nafardan, Najiyev, Aralov va Nomozovlar 6 nafardan, Ubaydullayev va Quyliyevlar 7 nafardan, Suyunovlar 8 nafar, Obidovlar 9 nafar, Xonimovlar 10 nafar tarbiyalanuvchilarni o‘z qaramog‘iga olib, “Oilaviy bolalar uyi”ni tashkil etgan.
Qashqadaryo viloyatida yetim va ota-ona qaramog‘idan mahrum bo‘lganlarni uy-joy bilan ta’minlash hamda muhtojlar bo‘yicha 24 nafar uy-joy bilan ta’minlangan.
Prezident Xonimova va Xolliyevlar oilasi 10 nafar, Suyunov va Xamidovalar oilasi 8 nafar, Allanazarova va To‘rayevlar oilasi 5 nafar ota-onasi mehridan ayrilgan bolalarni o‘z qaramog‘iga olganini ma’naviy jasorat deb atab, ularga o‘z nomidan va butun xalqimiz nomidan chuqur minnatdorchilik bildirdi.
“Hozirgi sharoitda bu ishlarni hamma ham tushunavermaydi. Buning juda katta ma’naviyati bor. Kim ekanligimizni, o‘zligimizni ko‘rsatyapsizlar. Hammaga namunasizlar. Vaqtimiz ziq bo‘lsada sizlar bilan gaplashayotganimiz bu xursandchiligimizdan”, — dedi prezident.
“Prezident bilan uchrashuvida yig‘lab yubordim, yig‘i o‘z-o‘zidan keldi. Ular bizning o‘qishimiz haqida gapirganlari butun umr yodimda qoladigan bo‘ldi. Juda xursand bo‘ldi. Kulib gapirayotgandim, baribir yig‘lab yubordim”, — deydi Shavkat Mirziyoyev suhbatda bo‘lgan bolalardan biri.
Bolajonlardan ayrimlari so‘zga ham chiqishib, ular ham entikib yig‘lab yuborishdi. Ularga qo‘shilib esa, zalda turganlar ham ko‘ziga yosh oldi.
Shuningdek, Shavkat Mirziyoyev bolajonlarga murojaat qilib, hech qachon o‘ksimasliklarini, doim o‘ziga ishonch bilan yurishlarini, yaxshi o‘qib, tarbiya olishlarini aytdi.
Bundan tashqari, davlat rahbari bolalarga sovg‘alar ulashdi.
Suhbat yakunida davlat rahbari oilalar bilan birga suratga tushdi.
Eslatib o‘tamiz, 2021-yilning 28-iyul kuni Shavkat Mirziyoyev mehribonlik uylarini Milliy gvardiya mas’ulligiga o‘tkazishni taklif qilgan edi.
Davlat rahbari shu kuni kam ta’minlangan oilalar hamda mehribonlik uylarida istiqomat qiluvchi bolalarni qo‘llab-quvvatlashga bag‘ishlangan videoselektor yig‘ilishida ota-onasidan ajragan, mehrga muhtoj bolalarni qo‘llab-quvvatlashga qaratilgan ustuvor vazifalarni belgilab olish zarurligini qayd etgandi.
“Albatta, har bir go‘dak bu yorug‘ dunyoga kelar ekan, unga hamma ota-onasi bag‘rida yayrab o‘ssin, baxtli-saodatli bo‘lsin, deb tilak bildiradi. Lekin taqdir taqozosi bilan ularning ayrimlari ota-ona mehridan benasib qoladi. Bunday holatda bu norasida bolalarning aslo aybi yo‘q ekanini barchamiz yaxshi tushunamiz, albatta”, — degan edi u.
Shuningdek, prezident sharoiti og‘ir bo‘lgan mehribonlik uylarini Prezident Administratsiyasi, Vazirlar Mahkamasi, viloyat hokimlari otaliqqa olishi haqida gapirgandi.
8-aprel kuni Shavkat Mirziyoyev Toshkentning Olmazor tumaniga tashrifi chog‘ida o‘tkazgan videoselektor yig‘ilishi davomida mamlakatda umuman yetimlar bo‘lmasa, yanada yaxshi bo‘lishini ta’kidlagan.
Izoh (0)