Toshkentda duatlon musobaqasi o‘tkazilishi sabab ayrim ko‘chalarda harakat vaqtincha cheklanadi

Toshkent markazidagi ayrim ko‘chalarda 23–24-aprel kunlari avtomobil harakati cheklanadi, deya xabar bermoqda poytaxt hokimligi.

Ma’lum qilinishicha, dam olish kunlari Toshkent shahridagi Xalqlar do‘stligi maydoni atrofida joylashgan ko‘chalarda sportchilar va havaskorlar orasida “Duatlon bo‘yicha O‘zbekiston chempionati-2022” bo‘lib o‘tadi. Shu sababli musobaqa kunlarida qator ko‘chalar soat 06:00 dan 14:30 ga qadar yopiladi:

• Furqat ko‘chasining Islom Karimov shohko‘chasi va Seul ko‘chasi oralig‘idagi qismi;
• Islom Karimov shohko‘chasining Furqat va Bunyodkor shohko‘chasi oralig‘idagi qismi;
• Bunyodkor shohko‘chasining Islom Karimov shohko‘chasi va Seul ko‘chalari oralig‘idagi qismi;
• Seul ko‘chasining Bunyodkor shohko‘chasi va Furqat ko‘chalari oralig‘idagi qismi.

Avvalroq ko‘prik qurilishi sabab Toshkentdagi TXAY ko‘chasining ayrim yo‘nalishlarida harakat vaqtincha cheklanishi, Toshkentda ta’mirlash ishlari sabab 6 ta ko‘chada harakat vaqtincha cheklangani to‘g‘risida xabar berilgandi.