Yevropa Rossiya gaziga bog‘liq, biroq Fransiya unga muhtoj emas. Bu haqda mamlakat prezidenti Emmanuel Makron France 5 telekanali efirida ma’lum qildi, deb yozadi Le Parisien.
“Biz uni (gazni — tahr.) boshqa joydan sotib olish uchun barcha harakatlarni amalga oshiryapmiz. Fransiya unga muhtoj emas”, — deydi Makron.
Makronning so‘zlariga ko‘ra, Rossiyani Ukrainadagi harbiy operatsiyalarni to‘xtatishga majburlash uchun “barcha ishni” qilish zarur, jumladan, Rossiyaga neftiga embargo joriy etishni ham.
O‘tgan dam olish kunlari Fransiya prezidenti mamlakatda gaz, neft va ko‘mir narxining pasaytirilishiga mas’ul bo‘ladigan energetik rejalashtirish vazirini tayinlash imkoniyatini ko‘rib chiqayotganini ma’lum qilgan edi.
Aprel boshlarida Yevropa Ittifoqi Ukrainadagi harbiy jinoyatlar bo‘yicha Rossiyaga qarshi beshinchi sanksiyalar paketini ma’qullagandi. Yangi sanksiyalar Rossiya ko‘mirining importiga to‘liq embargo qo‘yish, shuningdek, Rossiyaga qurol yetkazib berish va Rossiya yog‘ochlarining importini taqiqlashni o‘z ichiga oldi.
Qayd etilishicha, mazkur chora-tadbirlar Rossiyadan qazib olinadigan yoqilg‘ilar importini to‘liq taqiqlamaydi, biroq Yevropa Ittifoqi rasmiylari, agar Moskva keskinlashishda davom etsa, ushbu chora qo‘llanishi mumkinligini aytgan.
Keyinroq Litva tashqi ishlar vaziri Gabrielyus Landsbergis Yevropa Ittifoqi Rossiyaga qarshi oltinchi sanksiyalar paketi ustida ish boshlagani, u neft bilan bog‘liq cheklovlarni o‘z ichiga olishini ma’lum qilgan. Neft embargosi bundan oldingi beshinchi cheklovlar paketidan o‘rin olmagandi, biroq Bryussel mazkur sektorga sanksiyalar qo‘llashni muhokama qilishi haqida ogohlantirgan edi. Yevropa komissiyasi rahbari Ursula fon der Lyayyenning ma’lum qilishicha, muhokamada Rossiya nefti importida soliq solish yoki eskrou-hisoblar kabi “alohida to‘lov kanallari”ga oid g‘oyalar inobatga olinadi.
Mavzuga doir:
Yevropa davlatlari to‘lov shartnomada belgilangan valyutada amalga oshirilishi kerakligini ta’kidlamoqda. Yevropa Ittifoqi rahbari Ursula fon der Lyayenning fikricha, gaz uchun to‘lovlarni rublga o‘tkazish — Rossiyaning sanksiyalarni aylanib o‘tishga bo‘lgan urinishidir. “Katta yettilik” davlatlari Rossiya gazi uchun to‘lovni rublda to‘lashni rad etgan. “To‘lovni rublda qilish nomaqbul harakat va biz manfaatdor kompaniyalarni Putinning ushbu talablarini bajarmaslikka chaqiramiz”, — deydi Germaniya iqtisodiyot vaziri Robert Xabek.
Izoh (0)