Европа Россия газига боғлиқ, бироқ Франция унга муҳтож эмас. Бу ҳақда мамлакат президенти Эммануэль Макрон France 5 телеканали эфирида маълум қилди, деб ёзади Le Parisien.
«Биз уни (газни — таҳр.) бошқа жойдан сотиб олиш учун барча ҳаракатларни амалга оширяпмиз. Франция унга муҳтож эмас», — дейди Макрон.
Макроннинг сўзларига кўра, Россияни Украинадаги ҳарбий операцияларни тўхтатишга мажбурлаш учун «барча ишни» қилиш зарур, жумладан, Россияга нефтига эмбарго жорий этишни ҳам.
Ўтган дам олиш кунлари Франция президенти мамлакатда газ, нефть ва кўмир нархининг пасайтирилишига масъул бўладиган энергетик режалаштириш вазирини тайинлаш имкониятини кўриб чиқаётганини маълум қилган эди.
Апрель бошларида Европа Иттифоқи Украинадаги ҳарбий жиноятлар бўйича Россияга қарши бешинчи санкциялар пакетини маъқуллаганди. Янги санкциялар Россия кўмирининг импортига тўлиқ эмбарго қўйиш, шунингдек, Россияга қурол етказиб бериш ва Россия ёғочларининг импортини тақиқлашни ўз ичига олди.
Қайд этилишича, мазкур чора-тадбирлар Россиядан қазиб олинадиган ёқилғилар импортини тўлиқ тақиқламайди, бироқ Европа Иттифоқи расмийлари, агар Москва кескинлашишда давом этса, ушбу чора қўлланиши мумкинлигини айтган.
Кейинроқ Литва ташқи ишлар вазири Габриэлюс Ландсбергис Европа Иттифоқи Россияга қарши олтинчи санкциялар пакети устида иш бошлагани, у нефть билан боғлиқ чекловларни ўз ичига олишини маълум қилган. Нефть эмбаргоси бундан олдинги бешинчи чекловлар пакетидан ўрин олмаганди, бироқ Брюссель мазкур секторга санкциялар қўллашни муҳокама қилиши ҳақида огоҳлантирган эди. Европа комиссияси раҳбари Урсула фон дер Ляйеннинг маълум қилишича, муҳокамада Россия нефти импортида солиқ солиш ёки эскроу-ҳисоблар каби «алоҳида тўлов каналлари»га оид ғоялар инобатга олинади.
Мавзуга доир:
Европа давлатлари тўлов шартномада белгиланган валютада амалга оширилиши кераклигини таъкидламоқда. Европа Иттифоқи раҳбари Урсула фон дер Ляеннинг фикрича, газ учун тўловларни рублга ўтказиш — Россиянинг санкцияларни айланиб ўтишга бўлган уринишидир. «Катта еттилик» давлатлари Россия гази учун тўловни рублда тўлашни рад этган. «Тўловни рублда қилиш номақбул ҳаракат ва биз манфаатдор компанияларни Путиннинг ушбу талабларини бажармасликка чақирамиз», — дейди Германия иқтисодиёт вазири Роберт Хабек.
Изоҳ (0)