Shri-Lanka bosh vaziri Mahinda Rajapaksa mamlakat konstitutsiyasini isloh qilish g‘oyalarini qo‘llab-quvvatlashini ma’lum qildi. Bu haqda NewFirst portal xabar bergan.
Konstitutsiyaga o‘zgartirishlar kiritish muxolifatning asosiy talablaridan biri edi. Avval Shri-Lankadagi eng katta muxolifat partiyasi Birlashgan milliy kuch (SJB) konstitutsion islohotlar davri kelgani yuzasidan bayonotlar qilgandi.
Rajapaksa turli fraksiyalar tomonidan xalq oldida hisobdor hukumat tuzish takliflari berilganiga e’tibor qaratgan. Bosh vazir bayonotiga ko‘ra konstitutsion islohotlar ijro, qonunchilik va sud hokimiyatiga taalluqli bo‘ladi. O‘zgarishlar nimalarda iborat bo‘lishiga aniqlik kiritilmagan.
Shri-Lanka — unitar parlament-prezidentlik respublikasi. Mamlakatda 1978-yil 7-sentabrda qabul qilingan konstitutsiya amal qiladi. Mamlakatning asosiy qonuniga oxirgi marta 2015-yilda o‘zgartirishlar kiritilgan. Ushbu o‘zgarishlarga muvofiq prezidentlik lavozimining davri ikki muddat deb belgilangan.
Shri-Lanka 1948-yilda mustaqillikka erishgan davridan beri hali kuzatilmagan o‘ta og‘ir iqtisodiy inqirozni boshidan o‘tkazmoqda. Koronavirus pandemiyasi tufayli mamlakatga keladigan turistlar oqimi keskin kamaydi oqibatda xorijiy valyutaning kelishi to‘xtadi va import tovarlari uchun to‘lovlar qilish qiyinlashdi. Shri-Lankaning tashqi qarzi 35 milliard dollarga yetdi. Mart oyida mahalliy kupyuraning inflyatsiyasi 17 foizni tashkil qilgan.
Izoh (0)