Vladimir Putin Rossiya quruqlikdagi qo‘shinlarining 64-alohida motoo‘qchi brigadasiga gvardiya maqomini berdi. Bu haqdagi farmon Kreml rasmiy saytida e’lon qilingan.
Hujjat matnida ushbu harbiy maqom “brigada shaxsiy tarkibining qurolli nizolar vaqtida vatanni va davlat manfaatlarini himoya qilishda jangovar operatsiyalardagi qahramonona harakatlari, mardligi, shijoati va jasorati” sabab berilgani qayd etilgan.
Ukraina Mudofaa vazirligi 64-motoo‘qchi brigada Kiyev viloyatidagi Bucha shahrida kuzatilgan mudhish jinoyatlar va tinch aholining qiynoqqa solinganiga aloqador deb hisoblamoqda.
Bucha shahri Ukrainada urush boshlangan dastlabki kunlardanoq Rossiya qo‘shinlari ixtiyoriga o‘tgan. Mart oxirida rossiyalik harbiylar shahardan chiqib ketdi, shundan keyin Buchada o‘nlab ukrainaliklarning jasadlari ko‘chalarda qoldirilgani oydinlashdi. Halok bo‘lganlarning fotosuratlari va videolari, shuningdek shaharda yuz bergan voqealar haqidagi mahalliy aholi vakillarining hikoyalari jahon OAV hamda xalqaro huquq himoyachilari tashkilotlari tomonidan e’lon qilindi.
Ukraina ushbu qotilliklarda rossiyalik askarlarni aybladi. Rossiya hukumati vakillari Buchada yuz bergan voqealarni “provokatsiya” va “sahnalashtirilgan” ko‘rinishlar deb ta’rif bergan. Mustaqil manbalar Bucha ko‘chalaridagi murdalar Rossiya qo‘shinlari shahar hududini nazorat qilgan davrda ham bo‘lganini qayd etgan.
Mavzuga doir:
- Makron Rossiya hukumati Buchadagi jinoyat uchun javob berishi kerakligini aytdi. Shols esa yangi sanksiyalarni e’lon qildi
- Buchadagi ommaviy qirg‘in Yevropadagi vahshiyliklar ro‘yxatiga kiritiladi — Yevroittifoq
- Foto: Yevropa shaharlarida Buchada o‘ldirilgan tinch aholi xotirasiga bag‘ishlab aksiyalar o‘tkazildi. Ishtirokchilar qo‘llari orqaga bog‘langan holda yerga yotib olgan
Izoh (0)