Nukusda tirik chaqaloq yorib ko‘rilgani bo‘yicha uch nafar shifokorga sud hukmi o‘qildi

Qoraqalpog‘istonning Nukus shahrida 2021-yilning fevral oyida patologoanatom tomonidan yorib ko‘rilgan chaqaloq tirik bo‘lib chiqqani, holat yuzasidan jinoyat ishi qo‘zg‘atilgani xabar qilingandi. Oliy sud axborot xizmati o‘tkazilgan sud jarayoni haqida ma’lumot berdi.

Eslatib o‘tamiz, Nukus shahrida yashovchi fuqaro N.Y. 2021-yilning 14-fevral kuni qiz jinsli chaqaloqni dunyoga keltirgan. 15-fevral kuni soat 09:15 da Qoraqalpog‘iston Respublikasi hududiy perinatal markazi shifokorlari tomonidan ushbu chaqaloq o‘lgani qayd etilib, soat 10:15 da patologiya byurosi xodimlariga berib yuborgan. Patologiya byurosi xodimlari tomonidan chaqaloqning ko‘krak qafasida anatomik kesma kesgan vaqtida chaqaloqda hayotiy belgilar aniqlangan. Shunday bo‘lsa-da, unga birinchi tibbiy yordam ko‘rsatilmasdan, Qoraqalpog‘iston Respublikasi perinatal markazi shifokorlari chaqirilib, chaqaloq qaytarib berib yuborilgan.

Natijada chaqaloq o‘z vaqtida zarur tibbiy yordam ko‘rsatilmagani oqibatida vafot etgan. Ushbu holat yuzasidan Nukus shahar prokuraturasi tomonidan 2021-yil 6-aprel kuni Jinoyat kodeksining 116-moddasi (kasb yuzasidan o‘z vazifalarini lozim darajada bajarmaslik) 3-qismi bilan jinoyat ishi qo‘zg‘atilgan.

2022-yil 18-aprel kuni jinoyat ishlari bo‘yicha Nukus shahar sudi binosida jinoyat ishlari bo‘yicha Mo‘ynoq tuman sudi tomonidan hududiy perinatal markazi shifokori D.A. (1973-yilda tug‘ilgan), Bolalar ko‘p tarmoqli tibbiyot markazi shifokori R.S. (1972-yilda tug‘ilgan) va Patologik anatomiya byurosi shifokori G.K. (1988 yilda tug‘ilgan)ga oid jinoyat ishini ko‘rib chiqish bo‘yicha sud jarayoni tugab, sud hukmi e’lon qilingan.

Unga ko‘ra, D.A. va R.S.ga uzil-kesil o‘tash uchun 2 yil muddatga chaqaloqlarga reanimatsion yordam berish faoliyati bilan bog‘liq lavozimlarda ishlash huquqidan mahrum etgan holda, D.A.ga 4 yil muddatga, R.S.ga 2 yil muddatga ozodlikni cheklash jazosi tayinlangan. Shifokor G.K.ning xatti-harakatlarida jinoyat alomatlari mavjud bo‘lmagani bois aybsiz deb topilib, oqlangan.