Нукусда тирик чақалоқ ёриб кўрилгани бўйича уч нафар шифокорга суд ҳукми ўқилди

Қорақалпоғистоннинг Нукус шаҳрида 2021 йилнинг февраль ойида патологоанатом томонидан ёриб кўрилган чақалоқ тирик бўлиб чиққани, ҳолат юзасидан жиноят иши қўзғатилгани хабар қилинганди. Олий суд ахборот хизмати ўтказилган суд жараёни ҳақида маълумот берди.

Эслатиб ўтамиз, Нукус шаҳрида яшовчи фуқаро Н.Й. 2021 йилнинг 14 февраль куни қиз жинсли чақалоқни дунёга келтирган. 15 февраль куни соат 09:15 да Қорақалпоғистон Республикаси ҳудудий перинатал маркази шифокорлари томонидан ушбу чақалоқ ўлгани қайд этилиб, соат 10:15 да патология бюроси ходимларига бериб юборган. Патология бюроси ходимлари томонидан чақалоқнинг кўкрак қафасида анатомик кесма кесган вақтида чақалоқда ҳаётий белгилар аниқланган. Шундай бўлса-да, унга биринчи тиббий ёрдам кўрсатилмасдан, Қорақалпоғистон Республикаси перинатал маркази шифокорлари чақирилиб, чақалоқ қайтариб бериб юборилган.

Натижада чақалоқ ўз вақтида зарур тиббий ёрдам кўрсатилмагани оқибатида вафот этган. Ушбу ҳолат юзасидан Нукус шаҳар прокуратураси томонидан 2021 йил 6 апрель куни Жиноят кодексининг 116-моддаси (касб юзасидан ўз вазифаларини лозим даражада бажармаслик) 3-қисми билан жиноят иши қўзғатилган.

2022 йил 18 апрель куни жиноят ишлари бўйича Нукус шаҳар суди биносида жиноят ишлари бўйича Мўйноқ туман суди томонидан ҳудудий перинатал маркази шифокори Д.А. (1973 йилда туғилган), Болалар кўп тармоқли тиббиёт маркази шифокори Р.С. (1972 йилда туғилган) ва Патологик анатомия бюроси шифокори Г.К. (1988 йилда туғилган)га оид жиноят ишини кўриб чиқиш бўйича суд жараёни тугаб, суд ҳукми эълон қилинган.

Унга кўра, Д.А. ва Р.С.га узил-кесил ўташ учун 2 йил муддатга чақалоқларга реанимацион ёрдам бериш фаолияти билан боғлиқ лавозимларда ишлаш ҳуқуқидан маҳрум этган ҳолда, Д.А.га 4 йил муддатга, Р.С.га 2 йил муддатга озодликни чеклаш жазоси тайинланган. Шифокор Г.К.нинг хатти-ҳаракатларида жиноят аломатлари мавжуд бўлмагани боис айбсиз деб топилиб, оқланган.