Davlat ekologiya qo‘mitasi Toshkent viloyati Toshkent tumanidagi xonadonda sher bolasi noqonuniy boqilayotgani haqida xabar bergan edi. Qo‘mitaning “Daryo”ga ma’lum qilishicha, sher bolasi ushbu hududda yashovchi 3 yoshli qizchani tishlab olgan.
“Daryo” muxbiri qizchaning xolasi bilan suhbatlashib, voqea tafsilotlarini o‘rgandi.
Uning aytishicha, 7-aprel kuni tumanning “Bahor” mahallasi Navro‘z ko‘chasidagi uylarning birida noqonuniy boqilayotgan sher kechki 17:30 larda onasi va homilador yangasi bilan do‘konga sut olish uchun chiqqan bolaga hujum qilgan. To‘satdan bolaning orqa tomonidan kelib tashlangan yirtqich qizchaning bosh va yelka qismini tishlashni boshlagan. Ona bolasini sher og‘zidan qutqarib qolgan.
Voqea sherning egalari uydan tashqariga aylantirish uchun olib chiqqan paytda yuz bergan.
Hozirda bola Toshkent shahri Mirzo Ulug‘bek tumani 2-son bolalar jarrohlik klinikasida davolanmoqda. Qizchada jarrohlik amaliyoti o‘tkazilgan.
Ta’kidlanishicha, sher egalari qizchaning oilasiga bosim qilgan.
“Hudud inspektori kelib, qizning onasidan holat yuzasidan tushuntirish xati va ariza olib ketdi. Keyin bizga hujjatlarni prokuraturaga topshirganini aytdi. Biz holatning bosdi-bosdi bo‘lib ketishidan xavotirdamiz”, — deydi qizchaning xolasi.
Hozirda Ekologiya qo‘mitasi tomonidan hujjatlar rasmiylashtirilib, sher bolasi olib ketilgan. Hujjatlar huquqni muhofaza qiluvchi organlar tomonidan o‘rganilmoqda.
Izoh (0)