Andijon viloyatining Izboskan tumanida maktab o‘qituvchisi darsga kech qolgan o‘quvchiga majburan suv ichirgani, nok bargini yedirib, jazolagani haqida xabar berilgandi. “Daryo” muxbiri bilan suhbatlashganlarning aytishicha, Oliy ta’lim muassasasining 3-bosqichida o‘quvchi talaba o‘qituvchi 6-sinf o‘quvchisiga 2 litr ariq suvini ichirgani rost.
O‘quvchini jazolagan o‘qituvchining aytishicha, u darsga kechikkan o‘quvchidan qayerdan kelayotganini so‘ragan. O‘quvchi esa bunga javoban o‘qituvchiga ters gapirgach, o‘rtada tortishuv kelib chiqqan.
“Andijon davlat universitetining geografiya fakulteti 3-bosqich talabasiman. Ushbu maktabga 2022-yilning 7-fevral kunidan beri geografiya o‘qituvchisi sifatida ishga kelaman. O‘sha kuni navbatchi edim. O‘quvchimiz ikkinchi soatning o‘rtalarida maktabga kirib keldi. Sababini so‘raganimda ortiqcha gapirib, gap qaytardi. Shuningdek, o‘quvchining ‘shifoxonadan kelyapman, uydagilar o‘qituvchimga aytib qo‘yishgan’, degan gapi ham yolg‘on bo‘lib chiqdi. Aslida u daladan kelayotgan ekan. Shunga qaramasdan o‘quvchi savolimga ‘Sizning ishingiz nima?’, deya gap qaytarishda davom etdi. Keyin unga o‘zingni bosib ol deb, o‘zim iste’mol qilayotgan suvdan ichirdim. Gap qaytarmasligi kerakligi haqida tushuntirish berib darsga kiritib yubordim. Oradan ma’lum bir vaqt o‘tib, u qorni og‘riyotganini aytganidan keyin qishloq vrachlik punktiga olib bordim. Shifokorlarning aytgan gaplariga qaramasdan u tibbiy ko‘rikdan bosh tortib, uyiga ketib qoldi. Bor vaziyat shundan iborat. Bo‘lgan voqealarda o‘zimni oqlash niyatida emasman. Yosh o‘qituvchi sifatida bilmasdan xato qilib qo‘yganim uchun barcha hamkasblarim va ota-onalardan uzr so‘rayman”, — deydi o‘qituvchi.
Maktab direktorining o‘quv ishlari bo‘yicha o‘rinbosari Farida Usmonovaning aytishicha, u yig‘ilishdan kelganida dars o‘tayotgan o‘qituvchilardan biri o‘quvchini tashqariga olib chiqqan.
“Bu o‘qituvchimiz o‘sha kuni navbatchilikda turib, kech qoluvchi o‘quvchilarning kirdi-chiqdisini nazorat qilib turgan. O‘quvchi shu kuni ikkinchi soatdan ham kech qolgan. Voqeadan xabar topganimdan so‘ng o‘quvchi bolani chaqirdim-da, holatini aniqlashtirdim. O‘qituvchidan nima qilding deb so‘rasam, ozgina suv ichirganman dedi. Tezda ambulatoriyaga olib chiqishni buyurdim. U yerda shifokor ko‘rib qo‘yay desa, o‘quvchimiz uyiga ketib qolibdi. Uyda tez yordamga telefon qilishgan. Tez yordam borib, unga birinchi yordamni ko‘rsatgan. Men bundan hijolat bo‘lib, psixolog, ‘zamdirektor’, kasaba uyushma raisi, hattoki ‘uchastkovoy’ hamda mahalla yig‘inidagilarni olib, o‘quvchining uyiga bordik. Uyda e’tiborsiz qolmasin deb, shoshilinch tez tibbiy yordam filialiga olib keldik. Bu yerda Islombek degan yigit tekshiruv o‘tkazib, boladan hojatga borgan yoki bormaganini so‘radi. O‘quvchi ikki-uch marotaba bordim deganida undan o‘tib ketibdi, hijolat bo‘lmanglar qo‘rqinchlik narsa emas dedi. Onasiga Poytug‘ga olib borishni taklif qilganimda ‘opa hijolat bo‘lmang, hammasi yaxshi, hozir ukol qilib qo‘ydi’, degandi. Shu bilan uyiga ketishdi. Boshqa salbiy holatlar yuz bergani yo‘q”, — deydi Farida Usmonova.
Farida Usmonovaning qo‘shimcha qilishicha, shaxsan o‘zi o‘quvchini tuman markazida UZI va boshqa ko‘riklardan o‘tkazgan. Ambulatoriya shifokorlar davolanishga muhtoj emasligini bildirib, uyga javob bergan.
“Ertasi kuni o‘qituvchi va psixolog bilan birga o‘quvchimizdan xabar oldik. Chunki u o‘zimning jiyanim. Keyin o‘quvchining dadasiga qo‘ng‘iroq qildim. U Toshkentdaligini aytdi. Undan hijolat bo‘lmasligini o‘zim turganimni aytib, ertasiga tuman markaziga olib borib, shaxsan o‘zim UZI ko‘rigidan o‘tkazib, qon va siydik tahlillarini qildirdim. Hammasi yaxshi ekan. Markazda ham ko‘rsatib bo‘lib, yonimizdagi poliklinikaga olib kirib, pediatr vrachga ko‘rsatdim. Vrach UZI qog‘ozlari yaxshiligini, davolanishga muhtoj emasligini aytdi. Boshqa hech narsa bo‘lgani yo‘q” — deydi Farida Usmonova.
Lo‘g‘umbek qishloq vrachlik punkti umumiy amaliyot shifokori Zulxumor Suyarovaning ma’lum qilishicha, tahlil natijalari toza chiqqani va kasallik tasdiqlanmagani uchun o‘quvchiga muolaja yozib bermagan. Aksincha, qayta “analiz” topshirishni tavsiya qilgan.
“Ular 2022-yilning 8-aprel kuni qabulga keldi. Shikoyat oshqozon sohasida og‘riq ekanini aytishdi. Nima bo‘lganini so‘rasam, suv ichganman dedi. Keyin u bolaga birinchi yordam ko‘rsatish uchun og‘riq qoldiruvchi dori buyurdim. Shu bilan chiqib ketishdi. Orqasidan surishtirsam u bola o‘sha kuni ukolni olmasdan to‘g‘ri uyiga ketib qolgan ekan. O‘sha paytda o‘qituvchisi yonida edi. Ertasi kuni yana qabulga ammasi va o‘qituvchi bilan keldi. Poytug‘ga borib UZIga tushgan bo‘lgan, analiz qog‘ozlari bilan keldi. UZI qog‘ozida piyelonefrit deb bergan. Lekin tahlillari toza chiqqan. Shuning uchun hech qanday shamollash belgilarini ko‘rmadim. Shunda qayta analiz topshirishlarini so‘raganman. Kasalligi tasdiqlanmagani uchun unga muolaja yozmaganman. Chunki, tahlillari UZIga mos kelishi kerak edi, mos kelmagan. Ammo boladan biror joying og‘riyaptimi desam shikoyat qilmagan. Yaxshiman deb yonimda o‘ynab kulib, chiqib ketgan”, — deydi Zulxumor Suyarova.
O‘quvchining onasi “Daryo” muxbiri bilan suhbatda o‘qituvchi ularning qarindoshi bo‘lishini, qarindoshlar o‘rtasida hech qanday adovat yo‘qligini aytib, u o‘g‘liga archa yeyishni buyurganini, ammo o‘g‘li archa yemaganini bildirgan. O‘quvchining sinfdoshlari ham o‘qituvchining sinfdoshiga majburlab suv ichirganini aytmoqda.
Izboskan tumani hokimligining ijtimoiy tarmoqdagi sahifasida holat yuzasidan raddiya e’lon qilinib, “o‘qituvchi o‘sha kuni maktabda navbatchi sifatida faoliyat olib borgan. Shu sababli tartib-qoidaga mas’ul sifatida ish ko‘rgan. Darsga kech qolgan o‘quvchidan kech qolganining sababi so‘ralganida o‘quvchi uy yumushlari bilan kech qolganligini aytmasdan suv ichishga chiqib, kech qolganligini bildirgan. O‘rganish jarayonida bu holatni uning do‘stlari va sinfdoshlari ham tasdiqlagan”, deyiladi.
Shuningdek, hokimlik fan o‘qituvchisi o‘quvchi o‘z jiyani bo‘lganligi sababli unga tanbeh berganini, bolada hech qanday kasallik kuzatilmaganini, bola shifokor ko‘rigidan o‘tishdan bosh tortib, uyiga qochib ketganini yozgan.
Hokimlik axborot xizmati rahbari “Daryo” muxbiri bilan suhbatda “Dars o‘quvchi uchun tartib-qoida asosida o‘tiladi. Bu o‘qituvchi ba’zi o‘qituvchilardek o‘quvchini savalamagan. O‘quvchining o‘z yolg‘oniga qarshi ish qilgan. Ya’ni chanqagandim degan, o‘qituvchi suv ichirgan. Bu bilan men o‘qituvchining yonini olmayman. Pedkengash’da bu o‘qituvchi masalasi ko‘rilgan. Lekin, o‘quvchi ham yoshlikdan tartib qoidaga asosan ish ko‘rmasa, ertaga kim bo‘ladi? Hamma o‘z ishini bilib qilsa, bunday holatlar bo‘lmaydi-ku”, — deydi hokimlik vakili.
“Daryo” voqealar rivojini kuzatishda davom etadi.
Izoh (0)