Toshkentda qizini ayiq qafasiga tashlab yuborgan ayol javobgarlikdan ozod etildi

Toshkent hayvonot bog‘ida 28-yanvar kuni ayol kichkina qizaloqni ayiq qafasiga tashlab yuborgani haqida xabar berilgandi. Oliy sud matbuot kotibi holat yuzasidan qo‘zg‘atilgan jinoyat ishi bo‘yicha ma’lumot berdi.

Qayd etilishicha, 18-aprel kuni jinoyat ishlari bo‘yicha Yunusobod tuman sudida Jinoyat kodeksining 25,97-moddasi 2-qismi “v” bandida nazarda tutilgan jinoyatni sodir etganlikda ayblangan Z.T. (1991-yilda Toshkent shahrida tug‘ilgan)ga tibbiy yo‘sindagi majburlov ehtiyot chorasini qo‘llash masalasini hal qilishga oid jinoyat ishini ko‘rib chiqish bo‘yicha sud jarayoni o‘z nihoyasiga yetgan.

E’lon qilingan sud ajrimi bilan Z.T. ijtimoiy xavfli xatti-harakatini aqli noraso holatda sodir etgan, deb topilib, uning Respublika kuzatuvi kuchaytirilgan ruhiy kasalliklari shifoxonasida majburiy davolanishi belgilangan.

“Ushbu ajrimdan norozi tomonlar 20 sutka muddat ichida shu sud orqali Toshkent shahar sudiga xususiy shikoyat yoki xususiy protest keltirishga haqli”, — deyiladi xabarda.

Eslatib o‘tamiz, 28-yanvar kuni soat 12:00 larda yosh ayol noma’lum sabablarga ko‘ra odamlarning ko‘z oldida kichkina qizaloqni ayiq qafasiga tashlab yuborgan. Holat o‘rganilib, kichkina qizaloqni ayiq volyeriga tashlab yuborgan ayolga nisbatan jinoyat ishi qo‘zg‘atilgandi.

Keyinroq SSV yirtqich qafasiga tashlab yuborilgan qizchaning ahvoli to‘g‘risida ma’lumot berdi. Unda aytilishicha, 2018-yilda tug‘ilgan qizchaga dastlab hayvonot bog‘i hamshirasi birinchi yordam ko‘rsatgan. Shundan so‘ng u tez yordam mashinasida soat 13:30 larda Respublika shoshilinch tibbiy yordam ilmiy markaziga olib kelingan. Qizcha shifoxonada barcha zarur tibbiy ko‘riklardan zudlik bilan o‘tkazilgan.

Mahalla va oilani qo‘llab-quvvatlash vazirligi qizini ayiq qafasiga tashlab yuborgan ayol haqida ma’lumot bergan. O‘rganishlar davomida hodisa ishtirokchilari 1991-yilda tug‘ilgan fuqaro Z.T. va uning 2018-yilda tug‘ilgan qizi Z.A. ekani aniqlangan. Z.T. ismli ayol hozirga qadar o‘z otasi, fuqaro Y.T.ga tegishli xonadonda 2 nafar farzandi bilan yashab kelgan. Ayol bilan suhbat davomida uning Toshkentdagi oliy o‘quv yurtlaridan birida o‘qituvchi bo‘lib ishlashi, ayni vaqtda Rossiya davlatiga ketgan turmush o‘rtog‘i N.K. bilan hozirda birga yashamayotgani sababli ruhiy tushkunlikka tushib qolgani ma’lum bo‘lgan.

Ijtimoiy tarmoqlarda esa Toshkent hayvonot bog‘ida ayol kichkina qizaloqni ayiq qafasiga tashlab yuborgani aks etgan videolavha tarqaldi.

Keyinchalik ayiq qafasidan olib chiqilgan qizaloq 18 yoshga to‘lguncha Bolalar milliy tibbiyot markazining doimiy nazoratida bo‘lishi xabar qilindi. 21-fevral kuni qizaloq respublika shoshilinch tibbiy yordam ilmiy markazidan uyiga qaytarilgan.

Fevral boshida Bosh prokuratura ushbu ayol 2021-yilning iyul oyidan buyon ruhiy asab kasalliklari dispanserida ro‘yxatda turgani ma’lum qilgandi. Mart oyi so‘nggida qizini ayiq qafasiga tashlab yuborgan ayol ishi sudga yuborilgan.