O‘zbekistonda aholini koronavirusga qarshi emlash ishlari boshlanganiga bir yildan oshdi. Bugunga qadar mamlakatga olib kelingan va ishlab chiqarilgan vaksinalar miqdori 63 578 553 dozaga yetdi, deb xabar beradi SSV matbuot xizmati.
Vaksinalarning 42,2 million dozasi COVAX va boshqa dasturlar doirasida olib kelingan bo‘lsa, 21,4 million dozasi O‘zbekistonda ishlab chiqarilgan. Ularning qariyb 50 million dozasi emlash jarayonlarida qo‘llanilgan. Ayni paytda o‘rta hisobda kuniga 100 ming dozadan ortiq vaksina emlash uchun sarflanmoqda.
2021-yil 28-sentabrdan boshlab O‘zbekistonda 12—18 yoshli bolalarni ixtiyoriy tarzda emlash yo‘lga qo‘yilgan bo‘lib, birinchi doza bilan emlangan bolalar soni 670 420 nafarni tashkil etgan. Ularning 426 483 nafari to‘liq vaksina kursini olib bo‘lgan.
2021-yil 17-noyabrdan boshlab buster doza bilan emlash boshlangan bo‘lsa, bugungi kunga qadar vaksinaning uchinchi dozasi va buster doza bilan emlanganlar 13 664 985 nafarni tashkil etmoqda.
O‘tgan bir yil davomida:
- 2 443 760 doza AstraZeneca,
- 36 489 207 doza ZF-UZ-VAC2001,
- 1 339 649 doza Sputnik V,
- 4 598 185 doza Moderna,
- 2 784 717 doza Pfizer/BioNTech,
- 1 849 818 doza Sinovac,
- 286 072 doza Sputnik Light vaksinasinalari emlash jarayonlarida qo‘llanilgan.
Aprel boshlarida Sog‘liqni saqlash vazirligi O‘zbekistonda koronavirusga qarshi vaksina olishi ko‘zda tutilgan aholining 93 foizi emlanib bo‘lganini ma’lum qilgandi.
Izoh (0)