Ўзбекистонда аҳолини коронавирусга қарши эмлаш ишлари бошланганига бир йилдан ошди. Бугунга қадар мамлакатга олиб келинган ва ишлаб чиқарилган вакциналар миқдори 63 578 553 дозага етди, деб хабар беради ССВ матбуот хизмати.
Вакциналарнинг 42,2 миллион дозаси COVAX ва бошқа дастурлар доирасида олиб келинган бўлса, 21,4 миллион дозаси Ўзбекистонда ишлаб чиқарилган. Уларнинг қарийб 50 миллион дозаси эмлаш жараёнларида қўлланилган. Айни пайтда ўрта ҳисобда кунига 100 минг дозадан ортиқ вакцина эмлаш учун сарфланмоқда.
2021 йил 28 сентябрдан бошлаб Ўзбекистонда 12—18 ёшли болаларни ихтиёрий тарзда эмлаш йўлга қўйилган бўлиб, биринчи доза билан эмланган болалар сони 670 420 нафарни ташкил этган. Уларнинг 426 483 нафари тўлиқ вакцина курсини олиб бўлган.
2021 йил 17 ноябрдан бошлаб бустер доза билан эмлаш бошланган бўлса, бугунги кунга қадар вакцинанинг учинчи дозаси ва бустер доза билан эмланганлар 13 664 985 нафарни ташкил этмоқда.
Ўтган бир йил давомида:
- 2 443 760 доза AstraZeneca,
- 36 489 207 доза ZF-UZ-VAC2001,
- 1 339 649 доза Спутник V,
- 4 598 185 доза Moderna,
- 2 784 717 доза Pfizer/BioNTech,
- 1 849 818 доза Sinovac,
- 286 072 доза Sputnik Light вакцинасиналари эмлаш жараёнларида қўлланилган.
Апрель бошларида Соғлиқни сақлаш вазирлиги Ўзбекистонда коронавирусга қарши вакцина олиши кўзда тутилган аҳолининг 93 фоизи эмланиб бўлганини маълум қилганди.
Изоҳ (0)