Buxoro viloyatiga Turkmanistondan jami qiymati 3,2 milliard so‘m bo‘lgan mahsulotlar yashirin tarzda olib kirilgani aniqlandi. Bu haqda “Daryo”ga viloyat Bojxona boshqarmasi axborot xizmati rahbari Javohir Ismoilov xabar berdi.
Ta’kidlanishicha, 2022-yilning 11-aprel kuni viloyat Bojxona boshqarmasi “Olot” chegara bojxona postida qo‘shni davlatlardan kirib kelayotgan yuk avtomashinalari belgilangan tartibda Rapiscan inspeksion ko‘rik majmuasi orqali nazoratdan o‘tkazilgan. Barcha yuk avtomashinalarining yuk kuzatuv hujjatlari va rentgen tasviri tahlil qilingan.
Shu jarayonda, chegara postiga Turkmanistondan ikki yuk avtomashinasi kirib kelgan. Birinchi yuk avtomashina bojxona ko‘rigidan o‘tkazilganda, uning yuk salonida hujjatlarda qayd etilganidan 1,8 milliard so‘mdan ortiq turli xildagi kiyim-kechaklar borligi aniqlangan. Ikkinchi yuk avtomashinada esa 19 nomdagi qiymati 1 milliard 66 million so‘mga teng bo‘lgan avtomobil ehtiyot qismlari, 155 dona changyutgich va uy-ro‘zg‘or buyumlari antisanitar holatda topilgan.
Har ikki yuk avtomashinasi haydovchisi Turkmanistondan yashirin ravishda olib kirilayotgan mazkur tovarlar Buxorodagi savdo jamiyatlariga tegishli ekanini bildirgan.
Hozirda ushbu holatlar yuzasidan bojxona organlari tomonidan surishtiruv harakatlari davom ettirilmoqda.
Izoh (0)