AQSH hukumati Shimoliy Koreya xakerlarini 625 million dollardan ortiq mablag‘larni o‘g‘irlashga oid kiberjinoyatlarda aybladi, deb xabar beradi Business Standard.
Nashr ma’lumotlariga ko‘ra, amerikalik harbiylar mashhur Axie Infinity onlayn videoo‘yinining buzib kirilishini KXDR Razvedka bosh byurosi tomonidan nazorat qilinadigan deya hisoblanuvchi Lazarus Group xakerlar guruhiga bog‘lamoqda. Amerika hukumatining fikricha, xakerlar o‘yinning asosini tashkil etuvchi, ya’ni o‘yinchilar kriptovalyuta ko‘rinishida mukofotlanadigan blokcheyn tizimiga kirishga muvaffaq bo‘lgan.
“Surishtiruvimiz davomida o‘g‘irlik uchun Shimoliy Koreyaga bog‘liq Lazarus Group va APT38 guruhlari javobgar ekanini tasdiqladik”, — deyiladi Moliya vazirligi xabarida.
Shimoliy Koreyaga nisbatan sanksiyalarga rioya etilishini nazorat qiluvchi BMT ekspertlar guruhi Pxenyanni o‘g‘irlangan mablag‘larni o‘zining yadroviy va ballistik raketa dasturlarini qo‘llab-quvvatlashda foydalanishda ayblagan.
“Qo‘shma Shtatlarga KXDR AQSH va BMTning qattiq sanksiyalarini chetlab o‘tib, o‘zining ommaviy qirg‘in qurollari hamda ballistik raketalarini yaratish dasturini noqonuniy, jumladan, kiberjinoyatchilik orqali moliyalashtirishga tobora tayanayotgani ma’lum”, — deydi Moliya vazirligi vakili.
Shimoliy Koreya o‘z navbatida, xakerlik hujumlariga aloqasi borligini rad etgan.
Lazarus Group 2014-yilda Sony Pictures’ni buzib kirgani va maxfiy ma’lumotlar ommaga tarqatib yuborilganidan keyin mashhurlikka erishdi. Guruh Sony’dan Shimoliy Koreya yetakchisi Kim Chen Inni o‘ldirish fitnasi haqidagi komediya — “Intervyu”ni prokatdan olib tashlashni talab qilgan.
Izoh (0)