АҚШ ҳукумати Шимолий Корея хакерларини 625 миллион доллардан ортиқ маблағларни ўғирлашга оид кибержиноятларда айблади, деб хабар беради Business Standard.
Нашр маълумотларига кўра, америкалик ҳарбийлар машҳур Axie Infinity онлайн видеоўйинининг бузиб кирилишини КХДР Разведка бош бюроси томонидан назорат қилинадиган дея ҳисобланувчи Lazarus Group хакерлар гуруҳига боғламоқда. Америка ҳукуматининг фикрича, хакерлар ўйиннинг асосини ташкил этувчи, яъни ўйинчилар криптовалюта кўринишида мукофотланадиган блокчейн тизимига киришга муваффақ бўлган.
«Суриштирувимиз давомида ўғирлик учун Шимолий Кореяга боғлиқ Lazarus Group ва АPТ38 гуруҳлари жавобгар эканини тасдиқладик», — дейилади Молия вазирлиги хабарида.
Шимолий Кореяга нисбатан санкцияларга риоя этилишини назорат қилувчи БМТ экспертлар гуруҳи Пхеньянни ўғирланган маблағларни ўзининг ядровий ва баллистик ракета дастурларини қўллаб-қувватлашда фойдаланишда айблаган.
«Қўшма Штатларга КХДР АҚШ ва БМТнинг қаттиқ санкцияларини четлаб ўтиб, ўзининг оммавий қирғин қуроллари ҳамда баллистик ракеталарини яратиш дастурини ноқонуний, жумладан, кибержиноятчилик орқали молиялаштиришга тобора таянаётгани маълум», — дейди Молия вазирлиги вакили.
Шимолий Корея ўз навбатида, хакерлик ҳужумларига алоқаси борлигини рад этган.
Lazarus Group 2014 йилда Sony Pictures’ни бузиб киргани ва махфий маълумотлар оммага тарқатиб юборилганидан кейин машҳурликка эришди. Гуруҳ Sony’дан Шимолий Корея етакчиси Ким Чен Инни ўлдириш фитнаси ҳақидаги комедия — «Интервью»ни прокатдан олиб ташлашни талаб қилган.
Изоҳ (0)