Joriy yil I yarmida mamlakatda xorijdan ta’lim olishga kelganlar soni 2024-yil mos davriga nisbatan 17,3 foizga oshdi. Bu haqda Statistika qo‘mitasi xabar qildi.
2025-yil yanvar–iyun oylarida 9 ming 500 nafardan ortiq xorij fuqarolar O‘zbekistonga o‘qish maqsadida kelgan. Bu ko‘rsatkich o‘tgan yil shu davridagiga qaraganda 1 ming 400 nafarga (17,3 foiz) ko‘p.
Olti oyda xorijliklardan taʼlim olish uchun respublikaga kelganlar ichida Hindiston fuqarolari eng ko‘p bo‘ldi — 2 ming 780 kishi. Turkmaniston (2 ming 622 nafar) va Tojikiston (1 ming 145 nafar) fuqarolari soni ham boshqa mamlakatlarga nisbatan ko‘p bo‘lgan.
Yarim yil ichida yana quyidagi mamlakatlar fuqarolari o‘qish maqsadida O‘zbekistonga kelgan:
- Xitoy — 459 nafar;
- Janubiy Koreya — 381 nafar;
- Pokiston — 348 nafar;
- Qirg‘iz Respublikasi — 263 nafar;
- AQSH — 232 nafar;
- Afg‘oniston — 167 nafar;
- Turkiya — 161 nafar;
- Boshqa davlatlar — 988 nafar.
Avvalroq qo‘mita 2024-yilda 35,9 ming nafar chet ellik taʼlim olish uchun O‘zbekistonga kelganini maʼlum qilgandi. Ular orasida eng ko‘p tashrif buyurganlar tojikistonliklar bo‘lgan — 12 ming 809 nafar. Shuningdek, Rossiya (8 ming 629 nafar), Qirg‘iziston 3 ming 953 nafar), Turkiya (2 ming 711 nafar) davlatlaridan kelganlar yuqori ulushni tashkil etgan.
Izoh (0)