Angliyaning “Manchester Siti” klubi yozgi transfer oynasida yana bir yirik transferni amalga oshirishni rejalashtirmoqda. Pep Gvardiola jamoasi “Milan” hujumchisi Rafael Leauni o‘z safiga qo‘shib olishni istamoqda. Fichajes nashrining xabar berishicha, “shaharliklar” portugaliyalik futbolchini qo‘lga kiritish uchun 100 million yevro ajratishga tayyor.
Manbaga ko‘ra, Gvardiola “Siti” hujum chizig‘i uchun yangi nomzodlar qidirmoqda va Leau bu joy uchun munosib nomzod bo‘lib turibdi. “Milan” futbolchini qo‘yib yuborishni xohlamayapti, biroq 100 million yevrolik taklif klub rahbariyatini jiddiy o‘ylab ko‘rishga majbur qilishi mumkin.
Rafaelning “Milan” bilan shartnomasi 2028-yilning yoziga qadar amal qiladi. Futbolchining o‘zi hozircha “rossonerilar” safini tark etishga shoshilmayapti, ammo Gvardiola qo‘l ostida to‘p surish imkoniyati uning fikrini o‘zgartirishi mumkin.
Ma’lumot uchun, 26 yoshli portugaliyalik hujumchi o‘tgan mavsum “Milan” safida jami 50 ta o‘yinda maydonga tushib, o‘z hisobiga 12 ta gol va 13 ta golli uzatma yozdirib qo‘ygan. Transfermarkt portali Leauning qiymatini 70 million yevroga baholamoqda.
Izoh (0)