Armaniston iqtisodiyot vaziri Vagan Kerobyan mamlakat Rossiyadan xarid qilinayotgan gaz uchun to‘lovlarni rublda amalga oshirishni boshlaganini ma’lum qildi, deb xabar beradi “RBK”.
Kerobyanning tushuntirishicha, Armaniston YIIga a’zo davlatlar o‘rtasidagi hisob-kitoblarda milliy valyutaga o‘tish lozim deb hisoblangani sabab Rossiya gazi uchun to‘lovlarni rublda amalga oshirishi boshlagan. “Rossiya tomonidan bu borada oldinga siljish bor”, — deydi u.
Vazirning qo‘shimcha qilishicha, Armaniston gaz uchun oxirgi bir nechta to‘lovlarni amaldagi kurs bo‘yicha aynan rublda amalga oshirgan. Uning so‘zlariga ko‘ra, narxlarni belgilash dollarda shakllantirilmoqda. Buni “Gazprom” rasmiy vakili Sergey Kupriyanov ham tasdiqlagan.
“Haqiqatdan ham ‘Gazprom’ning Armanistonga gaz yetkazib berish shartnomasi bir necha yildan buyon to‘lovlarni rublda amalga oshirish imkonini bermoqda va bu imkoniyatdan foydalanilyapti”, — deydi u.
Bundan tashqari, Kerobyan to‘lov vositasi sifatida arman drami yoki qozoq tengesidan foydalanishni istisno etmagan.
23-mart kuni Vladimir Putin Rossiya gaz borasidagi hisob-kitoblarni rublda amalga oshirishini ma’lum qildi. U hukumat, Markaziy bank va “Gazprom”ga oy oxiriga qadar to‘lov valyutalarini o‘zgartirish bo‘yicha hisobot taqdim etishni buyurgan.
Yevropa davlatlari to‘lov shartnomada belgilangan valyutada amalga oshirilishi kerakligini ta’kidlamoqda. Yevropa Ittifoqi rahbari Ursula fon der Lyayenning fikricha, gaz uchun to‘lovlarni rublga o‘tkazish — Rossiyaning sanksiyalarni aylanib o‘tishga bo‘lgan urinishidir. “Katta yettilik” davlatlari Rossiya gazi uchun to‘lovni rublda to‘lashni rad etgan. “To‘lovni rublda qilish nomaqbul harakat va biz manfaatdor kompaniyalarni Putinning ushbu talablarini bajarmaslikka chaqiramiz”, — deydi Germaniya iqtisodiyot vaziri Robert Xabek.
Izoh (0)