Rossiya Mudofaa vazirligi ma’lumotlariga ko‘ra, avvalroq yong‘in sabab korpusi shikastlangan Rossiyaning “Moskva” raketa kreyseri belgilangan portga olib ketilayotganda cho‘kib ketdi.
Vazirlik ma’lumotlariga ko‘ra, kema bo‘ronli dengiz sharoitida o‘zining barqarorligini yo‘qotgan. Kreyser ekipaji hududdagi Rossiya Qora dengiz floti kemalariga evakuatsiya qilindi, deya qo‘shimcha qildi harbiylar.
13-aprel kuni kechqurun Ukraina ommaviy axborot vositalari va siyosatchilar “Moskva” kreyseri Ukrainada ishlab chiqarilgan ikkita “Neptun” qanotli raketalari bilan urilgani haqida xabar bergandi. Keyinroq Rossiya Mudofaa vazirligi kreyserda yong‘in chiqqanini, natijada o‘q-dorilar portlaganini ma’lum qildi. Vazirlik yong‘in sabablarini ma’lum qilmagan. Ertasi kuni Rossiya Mudofaa vazirligi kreyserdagi yong‘in to‘xtatilgani va kema portga olib ketilayotganini ma’lum qildi. Kreyser ekipaji orasida jabrlanganlar yoki qurbonlar bo‘lishi mumkinligi haqida ma’lumotlar yo‘q.
1976-yilda qurilgan va C-300 ga o‘xshash “Fort” havo mudofaa tizimi bilan jihozlangan “Moskva” raketa kreyseri Rossiya Qora dengiz flotining flagmani edi. Ukraina OAVlarining yozishicha, Rossiyaning Ukrainaga bostirib kirishi paytida Moskva kreyseri Odessa viloyatidagi Zmyeniy oroli yaqinidagi operatsiyada ishtirok etgan va Rossiya harbiy kemasiga so‘kinish bilan aytilgan ibora aynan unga qaratilgan.
Kreyser qator qurolli mojarolarda, jumladan Suriya urushida ishtirok etgan. Shundan keyin kemani bir necha yil mobaynida ta’mirlashgan. Kema ekipaji 510 kishini, uzunligi 190 metrni tashkil etardi. U qanotli raketalar majmuasi, bir necha zenit-raketalar majmualari, artilleriya va kemaga qarshi qurollar bilan jihozlangandi. Rossiya prezidenti Vladimir Putin bir necha marta xorijlik yetakchilar bilan kema bortida bo‘lgan.
Izoh (0)