Rossiyaning Ukrainaga bostirib kirish oqibatida 1,7 milliard odam — insoniyatning beshdan bir qismidan ortig‘i qashshoqlik, muhtojlik va ochlik domiga duch kelishi mumkin. Bu haqda BMT bosh kotibi Antoniu Guterrish ogohlantirdi.
Ukraina va Rossiya butun dunyo bo‘ylab ishlab chiqariladigan bug‘doy va arpaning 30 foizi, makkajo‘xorining beshdan bir qismi va kungaboqar yog‘ining yarmidan ko‘pi bilan ta’minlaydi. Shu bilan birga, iqtisodiyoti past rivojlangan dunyoning 45 ta davlati uchun Rossiya va Ukrainadan yetkazib berish ulushi ular tomonidan import qilinadigan barcha donning uchdan bir qismidan ko‘prog‘ini tashkil qiladi.
Shuningdek, BMT Rossiya dunyoda eng yirik gaz eksportchisi, neft bo‘yicha esa ikkinchi o‘rinda turishini eslatib o‘tgan.
Urush koronavirus pandemiyasi sabab rivojlanayotgan davlatlar duch kelgan muammolarni, tashqi qarz va inflyatsiyaning o‘sishini yanada chuqurlashtirdi.
2022-yil boshidan buyon bug‘doy va jo‘xori narxi 30 foizga oshgan, so‘nggi bir yil ichida neft narxi 60 foizdan ortiqqa ko‘tarilgan, tabiiy gaz va o‘g‘itlar narxi esa ikki barobargan oshgan.
Antoniu Guterrishning so‘zlariga ko‘ra, BMTning mazkur vaziyat bo‘yicha favqulodda choralar ko‘rishni moliyalashtirishga mablag‘i yetarli emas. Xususan, BMTning Jahon oziq-ovqat dasturi resurslar yetishmayotganini e’lon qilgan.
“Oziq-ovqat narxlarining ko‘tarilishi bilan ijtimoiy va siyosiy beqarorlik o‘rtasida to‘g‘ridan to‘g‘ri bog‘liqlik bor. Dunyomiz bunga qodir emas. Hozir harakat qilishimiz kerak”, — deydi Guterrish.
Avvalroq AQSH prezidenti Jo Bayden Ukrainadagi urush sabab oziq-ovqat inqirozi yuzaga kelishi, bu birinchi navbatda qashshoq davlatlarga ta’sir ko‘rsatishi haqida gapirgandi. Yirik xalqaro tashkilotlar, jumladan, Xalqaro valyuta jamg‘armasi, Jahon banki va Jahon savdo tashkiloti ocharchilikning oldini olish bo‘yicha sudlik bilan chora ko‘rishga chaqirgan edi.
Izoh (0)