Арманистон иқтисодиёт вазири Ваган Керобян мамлакат Россиядан харид қилинаётган газ учун тўловларни рублда амалга оширишни бошлаганини маълум қилди, деб хабар беради «РБК».
Керобяннинг тушунтиришича, Арманистон EИИга аъзо давлатлар ўртасидаги ҳисоб-китобларда миллий валютага ўтиш лозим деб ҳисоблангани сабаб Россия гази учун тўловларни рублда амалга ошириши бошлаган. «Россия томонидан бу борада олдинга силжиш бор», — дейди у.
Вазирнинг қўшимча қилишича, Арманистон газ учун охирги бир нечта тўловларни амалдаги курс бўйича айнан рублда амалга оширган. Унинг сўзларига кўра, нархларни белгилаш долларда шакллантирилмоқда. Буни «Газпром» расмий вакили Сергей Куприянов ҳам тасдиқлаган.
«Ҳақиқатдан ҳам ‘Газпром’нинг Арманистонга газ етказиб бериш шартномаси бир неча йилдан буён тўловларни рублда амалга ошириш имконини бермоқда ва бу имкониятдан фойдаланиляпти», — дейди у.
Бундан ташқари, Керобян тўлов воситаси сифатида арман драми ёки қозоқ тенгесидан фойдаланишни истисно этмаган.
23 март куни Владимир Путин Россия газ борасидаги ҳисоб-китобларни рублда амалга оширишини маълум қилди. У ҳукумат, Марказий банк ва «Газпром»га ой охирига қадар тўлов валюталарини ўзгартириш бўйича ҳисобот тақдим этишни буюрган.
Европа давлатлари тўлов шартномада белгиланган валютада амалга оширилиши кераклигини таъкидламоқда. Европа Иттифоқи раҳбари Урсула фон дер Ляйеннинг фикрича, газ учун тўловларни рублга ўтказиш — Россиянинг санкцияларни айланиб ўтишга бўлган уринишидир. «Катта еттилик» давлатлари Россия гази учун тўловни рублда тўлашни рад этган. «Тўловни рублда қилиш номақбул ҳаракат ва биз манфаатдор компанияларни Путиннинг ушбу талабларини бажармасликка чақирамиз», — дейди Германия иқтисодиёт вазири Роберт Хабек.
Изоҳ (0)