Indoneziyada yuzlab talabalar o‘simlik yog‘i qimmatlashgani va amaldagi prezident Joko Vidodoning muddati uzaytirilayotganiga qarshi norozilik namoyishlari o‘tkazmoqda. Bu haqda Reuters xabar berdi.
Agentlikning qayd etishicha, Indoneziyada politsiya tomonidan namoyishchilarni tarqatish uchun ko‘zni yoshlantiradigan gaz, vodomyotlardan foydalanilgan. Shundan keyin namoyishchi olomonning aksar qismi poytaxt – Jakartadagi parlament binosi yonidan qochib ketgan.
Miting Indoneziyaning boshqa hududlari, jumladan, Janubiy Sulavesi, G‘arbiy Yava va Jakartada o‘tkazilgan: yuzlab talabalar neon kamzullarda parlament tomon marshni amalga oshirgan, bu orqali oziq-ovqat mahsulotlari narxining oshib borayotgani hamda amaldagi prezident vakolatlarining yana ikki muddatga uzaytirilishiga qarshi norozilik bildirildi.
Norozilik namoyishi ishtirokchilari parlamentdan o‘z saylovlarni kechiktirish va prezident vakolatlarini uzaytirish bo‘yicha huquqidan foydalanib konstitutsiyaga o‘zgartirish kiritmaslikka chaqirgan. Ular hukumatdan birlamchi oziq-ovqat mahsulotlari narxlarini tushirishni talab qilgan.
Politsiyachilar prezident saroyiga olib boradigan yo‘llarni tikanli sim bilan to‘sishni boshlagan. Xavfsizlikni ta’minlashga 6826 nafar politsiya xodimi jalb qilingan.
Avvalroq Fransiyadagi prezidentlik saylovlari natijalariga qarshi norozilik namoyishlari bo‘lib o‘tgani, shuningdek, Pokistonda sobiq bosh vazir Imron Xon tarafdorlarining ko‘chalarga chiqib ommaviy namoyish o‘tkazayotgani haqida xabarlar berilgan.
Izoh (0)