Germaniyaning Rheinmetall konserni Ukrainaga avval foydalanilgan “Leopard 1” eski tanklaridan 50 ta yetkazib berishga qaror qildi. Bu haqda Handelsblatt gazetasiga tayanib, DW xabar tarqatgan.
Gap turli mamlakatlar armiyalari zaxirasidagi tanklar haqida bormoqda. Ayni vaqtda konsern harbiy mashinalarning holatiga baho bermoqda.
Xabarga ko‘ra, tanklarni yetkazib berish olti haftadan keyin boshlanishi, taxminan, uch oy davom etishi mumkin. Konsern professional harbiylar ushbu tanklar bilan ishlash ko‘nikmalarini o‘zlashtirib olishiga juda qisqa, ya’ni bir necha kun vaqt ketishini qayd etgan.
Ukrainaga tanklarni yuborish uchun Germaniya hukumatining ruxsatnomasini olish talab etiladi. 11-aprelda Germaniya Federativ Respublikasi tashqi ishlar vaziri Annalena Berbok Ukrainaga og‘ir artilleriya qurollari kerakligi va harbiy yordam ko‘rsatishni paysalga solishning vaqti emasligini ta’kidlagan.
Ukraina hukumati Moskva fevral oxirida mamlakat hududida harbiy operatsiyalar boshlaganidan beri bir necha marta og‘ir artilleriya qurollari, xususan, Rossiyaga qarshi turish uchun tanklarga ehtiyoj borligi yuzasidan bayonotlar bergan.
Avval Ukraina prezidenti Vladimir Zelenskiyning Janubiy Koreyadan qurol so‘ragani, Germaniya hukumatining ukrainalik qochoqlarni mamlakatga joylashtirish uchun 2 milliard yevro ajratishi, Estoniya Ukrainaga gaubitsa, tankka qarshi raketa, mina va dronlar partiyasini yetkazib bergani haqida xabarlar berilgan.
Izoh (0)