Hindiston bosh vaziri Narendra Modi Rossiya prezidenti Vladimir Putin hamda Ukraina rahbari Vladimir Zelenskiyga o‘zaro muloqotni to‘g‘ridan to‘g‘ri tashkil qilgan holda muzokaralar olib borishni taklif etdi, deya xabar bergan The Times of India.
“Rossiya prezidenti Putin va Ukraina davlat rahbari Zelenskiyga muzokaralarni to‘g‘ridan to‘g‘ri olib borishni taklif qildim”, — degan Modi.
Hindiston hukumati rahbari agar ushbu muzokaralar amalga oshsa, Rossiya va Ukraina nizosi tinchlik yo‘li bilan hal etilishiga umid qilish mumkinligini ta’kidlagan.
Mart boshida Modi va Putin telefon orqali suhbatlashgan, suhbat vaqtida Hindiston hukumati rahbari Rossiya hamda Ukraina o‘rtasida boshlangan tinchlik uchun muzokaralarni olqishlagan, bu orqali harbiy nizoga barham berilishi mumkinligiga umid qilishini qayd etgandi.
Shuningdek, Hindiston bosh vaziri Putinning Zelenskiy bilan bevosita muloqoti davom etayotgan tinchlik yo‘lidagi harakatlarga yanada kuchli turtki berishi haqida gapirgan.
Zelenskiy 4-aprelda Kiyevning Moskva bilan tinchlik kelishuviga erishish yuzasidan muhokamalarni davom ettirishi, sababi Ukrainada tinchlik o‘rnatish juda muhim vazifa ekanligini bildirgan. U Rossiya bilan muzokara olib boradigan delegatsiya tarkibini belgilaydigan farmonni ham imzolagandi. Shuningdek, Ukraina prezidenti Rossiyadagi hamkasbi bilan uchrashuv o‘tkazishi mumkinligiga sha’ma qilgan.
Kreml Zelenskiy va Putin Rossiya hamda Ukraina delegatsiyalari yakuniy hujjatni kelishib olganidan keyin uchrashishi mumkin deb hisoblamoqda.
Zelenskiy fevral oxirida Ozarbayjon prezidenti Ilhom Aliyev va Turkiya prezidenti Rajab Toyyib Erdo‘g‘on unga nizoni hal etish uchun Putin bilan muzokaralarga sharoit yaratishga tayyorligini ma’lum qilgani haqida bayonot bergan. Shuningdek, Qozog‘iston ham Ukrainadagi urushni to‘xtatish bo‘yicha vositachilikni taklif etgan.
Vengriya bosh vaziri Viktor Orban Vladimir Putin bilan telefon so‘zlashuvida Rossiya prezidentiga Vengriyada nafaqat Zelenskiy, balki Fransiya rahbari Emmanuel Makron bilan ham tinchlik muzokaralari uchun sharoit yaratib berishi mumkinligini aytgan.
Izoh (0)