Krasnodar o‘lkasining Ukraina bilan dengiz orqali chegaradosh bo‘lgan Yeysk va Sherbinovsk hududlarida terrorchilik xuruji xavfining “sariq” darajasi joriy etildi. Bu haqda Krasnodar gubernatori Veniamin Kondratyev xabar qilgan.
Belgorod viloyatida 11-apreldan 25-aprelga qadar terrorchilik xavfi eng yuqori – “sariq” darajaga chiqdi, deya bayonot bergan viloyat gubernatori Vyacheslav Gladkov.
“11-aprelda boshlab 25-aprelgacha butun viloyat hududida terrorchilik xavfining “sariq” darajasi joriy qilindi. Bu nima degani? Sariq daraja hukumatning, kuchishlatar tuzilmalar va aholi xavfsizligi uchun chora-tadbirlarni nazoratga olish imkonini beradi. Bundan qo‘rqish emas, balki birgalikda birdamlikda harakat qilish kerak”, — deb yozgan Gladkov.
Viloyat gubernatori terroristik xavf darajasi sabab Belgorod aholisiga quyidagi tavsiyalarni bergan:
- gavjum joylarga borishdan tiyilish,
- uydan chiqayotgan muhim hujjatlarni o‘zi bilan birga olib yurish,
- turar joylar yaqinida begona shaxslar yoki avtomobillar paydo bo‘lganida hushyorlikni yo‘qotmay, tegishli organlarga xabar berish,
- oila bo‘lib favqulodda holatlar yuz berganda qanday harakat qilish rejasini muhokama qilib olish.
11-apreldan Rossiyaning Kursk va Bryansk viloyatlarida, Voronej viloyatining ikki hududida terroristik xavfning “sariq” darajasi e’lon qilingan. Ushbu hududlarning hammasi Rossiya 24-fevralda maxsus harbiy operatsiyalarni boshlagan va hanuzgacha o‘zaro to‘qnashuvlar davom etayotgan Ukraina bilan chegaradosh.
Qrim rahbari Sergey Aksenov ham yarimorolning shimolida joylashgan tumanlar va shaharlarda terroristik xavfning “sariq” darajasini joriy etgan.
Izoh (0)