O‘nglar — “Milliy birlashuv” partiyasidan Fransiya prezidentligiga nomzod Marin Le Pen Yevroittifoq tarkibidan mamlakatni chiqarish uning siyosiy rejalariga kiritilmaganini ma’lum qildi. Nomzod ayol YI yanada takomillashishining tarafdori ekanini qayd etdi, deb yozmoqda “Kommersant”.
“Ammo men Yevropa tuzilmasi evolyutsiyaga uchrashini istayman. Bu haqda bir necha yildan beri gapirib kelaman. Yevropadagi oxirgi saylovlarda ham bu to‘g‘ridagi takliflarimni aytganman. Biz erkin va suveren Yevropa millatlari alyansini tuzishni istaymiz”, — degan Le Pen xonim jurnalistlar bilan suhbatda (“RIA Novosti” iqtibosi).
Prezidentlik saylovi kampaniyasi vaqtida Marin Le Pen mamlakat rahbarligiga saylansa, Fransiyani YI hamda NATO a’zoligidan chiqarishni, shuningdek, yevro rad etilishi, ikkinchi fuqarolik berish imkoniyatidan voz kechilishini va’da bergandi. Biroq oradan hech qancha vaqt o‘tmay, Le Pen ushbu va’dalaridan voz kechgan.
10-aprel kuni Fransiyada prezidentlik saylovlarining birinchi turi bo‘lib o‘tdi va amaldagi prezident Emmanuel Makron 27,84 foiz ovoz, Marin Le Pen esa 23,15 foiz ovoz bilan saylovlarning ikkinchi turiga o‘tgani ma’lum bo‘ldi.
Ma’lumot uchun, 2014-yilgacha jamoatchilikka uncha tanish bo‘lmagan Makron o‘sha yili bosh vazir Manuel Vals hukumatida Fransiya iqtisodiyot vaziri etib tayinlangan. Bu lavozimda ikki yil faoliyat olib borgan Makron 2016-yilda o‘z partiyasini tuzib, vazirlikdan iste’fo bergan va prezidentlik saylovida qatnashish uchun nomzodini ilgari surgan. 2017-yil may oyida bo‘lib o‘tgan saylovda mutlaq g‘alaba qozonib, Fransiya Respublikasining navbatdagi prezidenti etib saylangan — bu bilan u Fransiya tarixida eng yosh prezident bo‘ldi.
Izoh (0)