Индонезияда юзлаб талабалар ўсимлик ёғи қимматлашгани ва амалдаги президент Жоко Видодонинг муддати узайтирилаётганига қарши норозилик намойишлари ўтказмоқда. Бу ҳақда Reuters хабар берди.
Агентликнинг қайд этишича, Индонезияда полиция томонидан намойишчиларни тарқатиш учун кўзни ёшлантирадиган газ, водомётлардан фойдаланилган. Шундан кейин намойишчи оломоннинг аксар қисми пойтахт – Жакартадаги парламент биноси ёнидан қочиб кетган.
Митинг Индонезиянинг бошқа ҳудудлари, жумладан, Жанубий Сулавеси, Ғарбий Ява ва Жакартада ўтказилган: юзлаб талабалар неон камзулларда парламент томон маршни амалга оширган, бу орқали озиқ-овқат маҳсулотлари нархининг ошиб бораётгани ҳамда амалдаги президент ваколатларининг яна икки муддатга узайтирилишига қарши норозилик билдирилди.
Норозилик намойиши иштирокчилари парламентдан ўз сайловларни кечиктириш ва президент ваколатларини узайтириш бўйича ҳуқуқидан фойдаланиб конституцияга ўзгартириш киритмасликка чақирган. Улар ҳукуматдан бирламчи озиқ-овқат маҳсулотлари нархларини туширишни талаб қилган.
Полициячилар президент саройига олиб борадиган йўлларни тиканли сим билан тўсишни бошлаган. Хавфсизликни таъминлашга 6826 нафар полиция ходими жалб қилинган.
Аввалроқ Франциядаги президентлик сайловлари натижаларига қарши норозилик намойишлари бўлиб ўтгани, шунингдек, Покистонда собиқ бош вазир Имрон Хон тарафдорларининг кўчаларга чиқиб оммавий намойиш ўтказаётгани ҳақида хабарлар берилган.
Изоҳ (0)