Yevropa Ittifoqi Rossiyaga qarshi oltinchi sanksiyalar paketi ustida ish boshlamoqda, u neft bilan bog‘liq cheklovlarni o‘z ichiga oladi. Bu haqda Litva tashqi ishlar vaziri Gabrielyus Landsbergis Yevroittifoq tashqi ishlar vazirlari sammiti avvalida ma’lum qildi.
“Yevrokomissiya neft bilan bog‘liq cheklovlarni o‘z ichiga oladigan oltinchi sanksiyalar paketi ustida ish boshlashimiz haqida aniq aytdi. Bu konsensusga (yakdillik — tahr.) erishish ustida ish boshlaganimizni bildiradi”, — deydi Landsbergis.
Neft embargosi bundan oldingi beshinchi cheklovlar paketidan o‘rin olmagandi, biroq Bryussel mazkur sektorga sanksiyalar qo‘llashni muhokama qilishi haqida ogohlantirgan edi. Yevropa komissiyasi rahbari Ursula fon der Lyayenning ma’lum qilishicha, muhokamada Rossiya nefti importida soliq solish yoki eskrou-hisoblar kabi “alohida to‘lov kanallari”ga oid g‘oyalar inobatga olinadi.
Eskrou-hisob — muayyan holatlar yuzaga kelgunga yoki muayyan majburiyatlar bajarilgunga qadar mulk, hujjatlar yoki mablag‘lar inobatga olinadigan maxsus shartli hisob. Bu 2013-yilda Eronga qarshi sanksiyalarga qo‘llangan. O‘shanda AQSH boshqa mamlakatga ikkilamchi sanksiyalar orqali qo‘rqitib, uning neftini sotishni taqiqlagan. Natijada murosa varianti tanlangan: davlatlar Eron uchun to‘lovlarni o‘z valyutalarida maxsus hisob raqamiga kiritadi, uning mablag‘lari faqat ushbu mamlakatlardan ruxsat etilgan tovarlarni Eronga olib kirish uchun hisobdan chiqarilishi mumkin. Shu orqali Tehron valyutani to‘g‘ridan to‘g‘ri olmagan, buning o‘rniga barter tovarlari bilan ta’minlangan.
Yevropa Ittifoqi import qiladigan neftning 25 foizi Rossiya hisobiga to‘g‘ri keladi. Yevrokomissiya ma’lumotlariga ko‘ra, 2021-yilda YIga a’zo davlatlar Rossiyadan 48,5 milliard yevrolik neft, 22,4 milliard yevrolik neft mahsulotlarini import qilgan.
Avvalroq AQSH prezidenti Jo Bayden Rossiya nefti va gazini import qilishni taqiqlovchi qonunni imzolagandi.
Izoh (0)