Rossiyalik milliarder Roman Abramovich “Valensiya”ning yangi xo‘jayiniga aylanishi mumkin.
Klub aksiyalarini qo‘lga kiritishga da’vo qilayotgan ispan jamoasining sobiq vitse-prezidenti Migel Sorio “Chelsi”ning sobiq egasi “ko‘rshapalak”ni sotib olishga qiziqish bildirayotganini ma’lum qildi.
“Piter Lim Londonda klubni 250 million yevroga sotishga urinib ko‘rdi, ammo ulgurmadi. U yaqinda matbuotga ikkita — mendan va rossiyalik oligarxdan taklif borligi haqidagi ma’lumotni taqdim etdi”, — deb yozilgan Sorioning OAVga yuborgan xatida.
El Desmarque’ning xabariga ko‘ra, nashrning klubdagi manbalari “Valensiya”ning sotuvga qo‘yilganini inkor etmoqda.
Rossiyalik tadbirkorning vakili ham “Ma’lumotlar haqiqatga to‘g‘ri kelmaydi”, — deya ushbu xabarni rad etdi.
Avvalroq, Abramovich Turkiyaning “Go‘ztepe” klubini sotib olmoqchi ekanligi xabar qilingandi. Keyinchalik bu ma’lumot ham inkor etilgandi.
Eslatib o‘tamiz, 27-fevral kuni Abramovich Ukrainadagi vaziyat tufayli “Chelsi” boshqaruvini klub xayriya fondiga topshirdi. 3-mart kuni esa 2003-yildan beri boshqarib kelayotgan jamoasini sotishga qaror qilganini ma’lum qildi.
Abramovichga nisbatan qo‘llangan sanksiyalar tufayli “Chelsi” o‘y o‘yinlarga chipta sotish huquqidan mahrum qilindi. Shundan so‘ng klubning bosh homiysi jamoa bilan hamkorlikni to‘xtatdi. Bundan tashqari, “Chelsi”ning bank hisoblari ham muzlatildi.
Izoh (0)