Россиялик миллиардер Роман Абрамович «Валенсия»нинг янги хўжайинига айланиши мумкин.
Клуб акцияларини қўлга киритишга даъво қилаётган испан жамоасининг собиқ вице-президенти Мигел Сорио «Челси»нинг собиқ эгаси «кўршапалак»ни сотиб олишга қизиқиш билдираётганини маълум қилди.
«Питер Лим Лондонда клубни 250 миллион еврога сотишга уриниб кўрди, аммо улгурмади. У яқинда матбуотга иккита — мендан ва россиялик олигархдан таклиф борлиги ҳақидаги маълумотни тақдим этди», — деб ёзилган Сорионинг ОАВга юборган хатида.
El Desmarque’нинг хабарига кўра, нашрнинг клубдаги манбалари «Валенсия»нинг сотувга қўйилганини инкор этмоқда.
Россиялик тадбиркорнинг вакили ҳам «Маълумотлар ҳақиқатга тўғри келмайди», — дея ушбу хабарни рад этди.
Аввалроқ, Абрамович Туркиянинг «Гўзтепе» клубини сотиб олмоқчи эканлиги хабар қилинганди. Кейинчалик бу маълумот ҳам инкор этилганди.
Эслатиб ўтамиз, 27 февраль куни Абрамович Украинадаги вазият туфайли «Челси» бошқарувини клуб хайрия фондига топширди. 3 март куни эса 2003 йилдан бери бошқариб келаётган жамоасини сотишга қарор қилганини маълум қилди.
Абрамовичга нисбатан қўлланган санкциялар туфайли «Челси» ўй ўйинларга чипта сотиш ҳуқуқидан маҳрум қилинди. Шундан сўнг клубнинг бош ҳомийси жамоа билан ҳамкорликни тўхтатди. Бундан ташқари, «Челси»нинг банк ҳисоблари ҳам музлатилди.
Изоҳ (0)