Pokiston Oliy sudi Milliy Assambleyaning tarqatib yuborilishini “konstitutsiyaga zid” deb topdi, deb yozmoqda Reuters. Assambleya bosh vazir Imron Xonning murojaati ortidan prezident Orif Alviy qarori bilan tarqatib yuborilgandi.
“Bosh vazirning prezidentga Milliy assambleyani tarqatib yuborishni maslahat berishga haqqi yo‘q edi. Shu paytgacha qabul qilingan barcha qarorlar bekor qilindi”, — deya Oliy sud qaroridan iqtibos keltirgan nashr.
Oliy sud Milliy Assambleyaga 9-aprel, shanba kuni bosh vazir Imron Xonga ishonchsizlik votumi berish uchun yig‘ilish chaqirishni buyurdi.
Eslatib o‘tamiz, 3-aprel kuni Orif Alviy bosh vazirning taklifiga binoan Milliy Assambleyani (parlament quyi palatasi) tarqatib yubordi. Bu muxolifatning Xonni mamlakatdagi iqtisodiy vaziyatni yaxshilay olmayotganlikda, shuningdek, korrupsiyada ayblab, bosh vazirga ishonchsizlik votumini e’lon qilishga urinishlar boshlanganidan keyin yuz berdi.
Imron Xon hokimiyatdan chetlatishga urinishlar uning Xitoy va Rossiya bilan yaxshi munosabatlarini yoqtirmaydigan xorijiy davlatlar, xususan, AQSHning aralashuvi bilan amalga oshirilganini aytdi. Vashington bu ayblovlarni rad etmoqda.
69 yoshli Imron Xon, sobiq sportchi va professional kriketchi, 2018-yilning avgustidan beri Pokiston bosh vaziri lavozimida ishlab kelmoqda. 1996-yilda “Tehrik-i-Insaf” partiyasini tuzgach, respublikadagi eng mashhur siyosatchilardan biriga aylandi.
Izoh (0)