Latviya parlamenti 2022-yilda 9-mayni Ukrainadagi jangovar harakatlar paytida halok bo‘lgan tinch aholi va ukrainalik harbiy xizmatchilarni xotirlash kuni deb e’lon qilish to‘g‘risidagi qonunni qabul qildi.
Shu kuni prezident qarorgohi, Seym (parlament) va hukumat binolari, boshqa davlat muassasalari, shuningdek, turar joy binolari yaqinida motam bayrog‘i ko‘tarilishi kerak. Latviya bayrog‘i yoniga Ukrainaning motam bayrog‘i ilinadi.
Bundan tashqari, tadbirni ommaviy nishonlash bekor qilinmoqda. Faqat marhumlarni xotirlash uchun mitinglar, yurishlar yoki piketlar o‘tkazishga ruxsat beriladi. 9—10-may kunlari mushakbozlik o‘tkazish taqiqlangan, qonunbuzarlar javobgarlikka tortiladi. Qonun 2022-yilning 11-mayiga qadar amalda bo‘ladi.
31-mart kuni parlament “Ommaviy ko‘ngilochar va bayram tadbirlarining xavfsizligi to‘g‘risida”gi qonunga o‘zgartirish kirishni ma’qullagan edi. Qonun 9-mayda G‘alaba kuni bayramini nishonlashni amalda taqiqlaydi. Tuzatishlarga ko‘ra, Sovet armiyasiga tegishli har qanday yodgorlik, jumladan, Pardaugavedagi Rigani ozod etganlar haykalining 200 metr atrofida tadbir o‘tkazish taqiqlandi.
Ommaviy tadbirlarda fashistlar va kommunistik tuzumlar mafkurasini o‘z ichiga olgan tadbirlarni, shu jumladan, ushbu mafkura vakillarining tug‘ilgan kunlarini, janglar va g‘alabalarni xotirlash kunlarini, hududlarning yoki uning bir qismining bosib olinishini ulug‘lash mumkin emas. Bunday tadbirlarning maqsadi totalitar tuzumlarni ulug‘lash yoki sodir etilgan jinoiy harakatlarni oqlash bilan bog‘liq bo‘lmagan va ta‘lim, ilmiy yoki badiiy maqsadlarda foydalanilgan hollar bundan mustasno. Shuningdek, Seym Rossiya rasmiylari Ukrainadagi harbiy operatsiya vaqtida ishlatadigan Z harfidan foydalanishni taqiqlagan.
Z va V harflaridan, shuningdek, Georgiy lentasidan foydalanish Moldova parlamenti tomonidan ham taqiqlangan. Qonunbuzarlar jarimaga tortiladi. Z ramzi Germaniyaning qator federal hududlaridan taqiqlandi. Bundan tashqari, Estoniya adliya vaziri Maris Lauri ham undan foydalanishni taqiqlashni taklif etgan.
Rossiya Mudofaa vazirligining ma’lum qilishicha, Z harbi “G‘alaba uchun”, V esa “Kuch adolatda” a “Vazifa bajariladi” ma’nolarini bildiradi. Dastavval ushbu harflar Ukrainadagi maxsus operatsiyada ishtirok etgan harbiy texnikalarga tushirilgan edi.
Izoh (0)