Nyu-York bosh prokurori shtat sudidan AQSHning sobiq prezidenti Donald Trampni sudga hurmatsizlik qilgani uchun javobgarlikka tortishni so‘radi, deb xabar beradi Reuters.
Agentlik ma’lumotlariga ko‘ra, siyosatchi sud organlariga moliyaviy operatsiyalari va Trump Organization kompaniyasini tergov qilish yuzasidan hujjatlarni taqdim etishdan bosh tortgan. Bu kabi harakat “sudga hurmatsizlik” deb baholanadi.
Bosh prokuror Letitsiya Jeyms sudga kiritgan arizasida Tramp sudning 31-martga qadar hujjatlar va ma’lumotlarni taqdim etish to‘g‘risidagi qarorini bajarmagan. Shu sababli prokuror Trampni 10 ming dollar jarimaga tortishni talab qilgan.
“Sud qarori aniq edi: Donald Tramp bizning chaqirig‘imizga rioya qilishi va tegishli hujjatlarni mening idoramga topshirishi kerak. Tramp sudning qaroriga bo‘ysunish o‘rniga, unda qochishga urinmoqda”, — deyiladi Jeymsning bayonotida.
Prokuraturaning ayblov xulosasida 15 ta band bor, jumladan, soliqqa oid firibgarlik, hujjatlarni qalbakilashtirish va o‘ta yirik miqdorda o‘zlashtirish.
Ta’kidlash kerakki, Trampning o‘zi bir necha bor qonunbuzarliklari to‘g‘risidagi ayblovlarni rad etib, tergovni “jodugar ovi” deb atagan va 2021-yilda prokurorni sudga bergandi.
“Biz Bosh prokuratura tomonidan berilgan bema’ni va asossiz arizaga keskin qarshilik ko‘rsatishga tayyormiz. Mijozimiz yillar davomida Bosh prokuratura tomonidan taqdim etilgan ma’lumotlar bo‘yicha ko‘plab so‘rovlarni doimiy ravishda bajarib kelgan”, — deydi Trampning advokati Alina Xabba.
Nyu-York bosh prokurorining Trump Organization ustidan tekshiruvi 2019-yildan buyon davom etmoqda. Avvalroq Manxetten okrugi prokurori Sayrus Vens Trampning moliyaviy ishlarida shtat qonunlarining ehtimoliy buzilish holatlarini aniqlash maqsadida jinoiy ish qo‘zg‘atganini ma’lum qilgan edi. Vensning idorasi Trampning soliq deklaratsiyasini o‘z ichiga olgan millionlab sahifadan iborat hujjatlarni tekshirmoqda.
Izoh (0)